MPS udah ngelancharka Kimpin #SibuBebasPlastik

SIBU: Berindik ari pangka enda manah nguna kambut plastik ngagai rampa menua, Kaunsil Mengeri Sibu (MPS) udah ngelancharka Kimpin # SibuBebasPlastik, kilah lemai ensanus.

Chairman MPS, Datuk Tiong THai King madah, pengawa ngena kambut plastik ari mensia mayuh diatu majak nambah.

“Berindik ari nya, piak MPS udah ngelancharka Kimpin #SibuBebasPlastik tu dikena meri penyedar ngagai mensia mayuh.

“Kimpin tu beguna amat dikena ngintu rampa menua sereta nempa Sibu nyadi lebih gadung,” ku iya rambau bejadika kimpin ba Wisma Sanyan, kilah lemai ensanus.

Bela bisi datai Residen Bagi Menua Sibu Charles Siaw, Ketuai Pengerai Rama Menteri Kaunsil Kandang Menua enggau Pengawa Berumah Sarawak Dr Cheong Yaw Liang, chairman pengatur program kimpin Kaunselor Nazatusyima Bujang sereta ke bukai.

Nengah pengawa ngelancharka kimpin nya, semua premis dagang nadai meri kambut plastik ngagai penguna berengkah 1 Januari, 2018.

“Mensia mayuh diper- ansang mai kediri kambut maya deka bebelika barang,” ku Tiong.

Iya mega gaga ati meda timbal ke chukup manah ari mensia mayuh enggau pedagang sekumbang timpuh nguji.

“Aku ngarap genap iku orang deka terus nyukung kimpin tu,” ku iya.

Nangkan nya, Nazatusyima ba jaku iya madah, Kimpin Nyebut Enggai Ngagai Kambut Plastik udah bepun ba taun 2006.

Kimpin nya ku iya, tetap nyingkang ngagai tikas ke baru nengah Kimpin Nyebut ENggai Ngagai Kambut Plas- tik 2.0 ba ujung taun 2017, iya nya pengawa ngena kambut plastik enda dikemendar pengelama tiga hari iya nya Hari Enam, Minggu enggau Satu.

“Ungkup taun tu, kimpin tu dilanjar ngagai tujuh hari laban MPS agi bejalaika nya enggau bakih strategik baka pasar besai, stesyen minyak, kedai bup, farmasi enggau mayuh agi ke bukai.

“Kami ngarap mayuh agi deka ayan begulai dalam ngemeranka insiatif gadung tu enggau chara ngengkahka stiker lambang kimpin ba premis lalu nadai ngena kambut plastik,” ku iya.