Bisi 24,500 iku ukui di bagi menua Sibu deka dituchuk vaksin rabies
SIBU: Program nuchuk vaksinasi rabies nyelinting urung 70 peratus tauka 24,500 ari 35,000 iku ukui ba bagi menua Sibu deka diberi tuchuk nya.
Menteri Muda Pengawa Berumah enggau Pengerai Rama Dr Annuar Rapaee madah, program vaksinasi endang sebagi ari strategi ke dipejalai nagang rabies ngerekai ba Sibu.
“Kami melabaka Sibu ngembuan urung 35,000 iku ukui. Nyadi, selinting kami deka meri tuchuk vaksin rabies 70 peratus ari 35,000 iku ukui ba Sibu,” ku iya.
Dr Annuar ke mega Menteri Muda Pelajar enggau Pansik Teknologi madah lebuh dirandau pemberita ba program nuchuk vaksinasi rabies ba Dewan Komuniti Sibu Jaya ditu, ensanus.
Program nuchuk vaksinasi rabies enda bebayar nya dipejalaika ngagai ukui berengkah jam 9 pagi nyentuk 4 lemai lalu program deka ditampung ba palan enggau jam sebaka kemari.
Opis Servis Veterinar Bagi Menua Sibu bejalaika aktiviti nuchuk vaksinasi rabies ngagai orang ke ngempu ukui tupi.
Dr Annuar ke mega Kaban Kunsil Nengeri ( ADUN) Nangka mega nangkan mensia mayuh terus meri sukung ngagai sida lalu mai ukui sida betuchuk vaksin enda bebayar.
“Aku ngarap mensia mayuh ulih nguna peluang tu mai ukui sida betuchuk enda bebayar ba palan ke udah ditetap.
“Mensia mayuh patut nemu pemesai guna vaksinasi. Ukui kita enda ulih linding ari rabies nyema enda dituchuk vaksinasi. Lalu tu deka meri pekara enda disadang ngagai orang ke ngempu ukui enggau sida sebilik,” ku iya.
Ku iya, urung 29 palan bisi nyendiaka servis vaksinasi enda bebayar bepun kemari nyentuk 1 Mac ba palan ke bebida.
Dr Annuar mega minta mensia mayuh terus betelefon nuju lumur 013-8077964 tauka 084-310808 enti deka nemu pasal palan enggau haribulan maya betuchuk vaksin pechuma ungkup ukui sida.
Ku iya, orang ke ngempu ukui tau mai ukui sida ngagai dedini palan lalu ukai reti meseti berimbai enggau genturung pendiau sida.
Ukui ke udah dituchuk deka dikelai ngena rantai plastik sereta bulih setipikit ari Opis Servis Veterinar.
Ngelansa pasal program vaksinasi ba 33 buah rumah panjai ba sitak DUN Nangka, Dr Annuar madah, raban servis mindah kin kitu deka ditumbuh ngelawa rumah panjai lalu meri ukui sida vaksin.
Berebak enggau nya, 197 iku ukui udah dituchuk vaksin nyerumba program ke diatur ba Dewan Komuniti Sibu Jaya, Sibu Jaya, ensanus.
Sama bisi datai Ketuai Seksyen Pengerai Mensia Mayuh Opis Menteri Kaunsil Kandang Menua enggau Pengawa Berumah Dr Cheong Yaw Liang, Residen Sibu Charles Siaw, Chairman Kaunsil Pelilih Menua Pesisir Sibu (MDLBS) Sempurai Petrus Ngelai, Sapit Chairman MDLBS Robert Lau, Sekretari MDLBS Justani Joni enggau pemangku Sekretari Kaunsil Mengeri Sibu (MPS) Jong Thain Puk.