Taja pia rayat nengeri tu patut meri kerejasama rat ngambika tetiap pejalai projek pemansang lanchar lalu enda tejanggal
SRI AMAN: Sapit Menteri Dalam Menua II Datuk Masir Kujat madah seriris enggau pemansang ti nyadi diatu, perintah seruran ransing deka mai pengelantang enggau pengelikun ngagai semua serak komuniti di nengeri tu kelebih agi peranak di kandang menua pesisir.
Ku iya, pengawa nya ulih dipeda nengah mayuh program pemansang ke udah, tengan sereta deka digaga perintah nengeri ungkup pemaik enggau pengelantang rayat.
Iya ke mega Kaban Parlimen (MP) Sri Aman madah munyi nya lebuh ti bejaku maya bejadika Pengerami Pemesai Begulai Enggau Rayat ti digaga ba Rumah Kunsilor Luang, Danau Keranggas Melikin ditu.
Taja pia, ku iya, pengawa ngatur pemansang perintah tusah dijapai enggau manah nyema rayat enda ngena memanah semua awak sereta perengkaguna pemansang ke udah disediaka perintah.
“Tu udah tentu deka ngeru- gika kitai semua lalu ulih ngemuntanka pengelanchar pejalai semua projek pemansang di nengeri tu,” ku iya.
Beserimbai enggau nya, kitai enda ulih ngatika diri lalu semina ngarapka semua bantu sereta subsidi ari perintah aja. Tang mega patut nemu gawa kediri, ngiga inisiatif sereta nemu ngerebut awak ke bisi disediaka ngagai kita iya nya peluang dalam sektor industri, dagang, teknologi pemadah enggau komunikasyen (ICT), kebun dandang besai, pelajar, dagang temuai, servis enggau ke bukai.
Dalam pekara tu, kitai patut nemu berati sereta nerima ubah enggau penemu baru nengah ngubah chara kitai berunding enggau kereja ngambika enda tinggal ari arus pemansang. Tu kelebih agi laban kitai patut udah nyikap diri enggau pengelandik ti chukup kenyau ari diatu ngambi ulih nyapai juluk menua kitai ti deka nyadi menua mansang ba taun 2020 ila.
Ku Masir nambah, lebuh ti deka napi ubah globalisasyen ari pemansang teknologi pemadah enggau komuni- kasyen, pengawa dikena ngangkat ‘ Komunikasyen Pemansang’ ti nyadi makin berat nengah pemisi peminta ti deka ngadaka komuniti bepenemu sereta bisi runding tauka K-Society.
“Beserimbai enggau nya, kuasa berunding komuniti enggau penau ngaga inovasyen patut dikemerat ngambika ulih besemekih lalu napi penguji sosio-ekonomi diatu. Enggau chara tu mega, kitai ulih nyedar, ngubah ulah enggau runding, meransang komuniti dikena nerenak runding angkunka penemu sereta nerima lalu nguji idea baru dikena ngangkatka tikas pengidup sida.
“Bekunsika penerang bekaul pemansang tu endang nyadi pekara besai perintah ti disadung nengah opis enggau ejensi pemansang. Taja pia, pemanah sereta pemaik pengawa nyadung penerang tu deka nyadi manah agi nyema nya digaga begulai ti ngaul mayuh piak baka ketuai komuniti, piak peribit, media enggau raban volunteer sereta Gerempung Ukai Dikuasa Perintah ( NGO),” ku iya nampung.
Sama bisi datai maya pengerami nya Menteri Muda Nembiak, Lumba enggau Main ke mega Kaban Kunsil Nengeri (ADUN) Balai Ringin Datuk Snowdan Lawan, Penghulu Rungka Jimbai sereta ke bukai.
Ba pengerami nya, Masir mega udah madahka agih belanja sepenyampau RM50,000 diberi ngagai Komiti Pemansang enggau Pengelikun Genturung Pendiau (JKKK) enggau Gerempung Indu, lalu Datuk Snowdan udah meri RM10,000 ngagai JKKK rumah panjai nya sereta RM3,000 ungkup Gerempung Indu.
Tu udah tentu deka ngerugika kitai semua lalu ulih ngemuntanka pengelanchar pejalai semua projek pemansang di nengeri tu. Datuk Masir Kujat Sapit Menteri Dalam Menua II