Chalun PDP deka ngetanka penuduk di Parlimen Saratok maya PRU14
SARATOK: Kaban Kunsil Nengeri (ADUN) Meluan Roland Duat udah diberi tanggungpengawa ngetuaika operasyen Parti Prograsif Demokratik ( PDP) dalam pengawa parti nya ti deka ngetanka penuduk chalun di sitak Parlimen Saratok ba Pengawa Bepilih Besai ke-14 (PRU14) ti deka datai.
Chalun ari PDP ti deka ngetanka penuduk di Saratok ke diatu dipegai Tan Sri William Mawan Ikom ti mega chalun terus Barisan Nasional (BN), pia ku dipadah Presiden PDP Dato Seri Tiong King Sing lebuh ti bejaku maya pengerami pemesai begulai enggau rayat di Rumah Jabu, Nanga Senulau, Budu ditu, kilah ensana.
Beserimbai enggau nya, Tiong madah, PDP ke sebedau tu dikumbai Parti Progresif Demokratik Sarawak (SPDP) endang diberi pemendar bediri di Saratok lalu udah kala menang ari tikit parti.
Taja pia Tiong bedau deka madahka chalun ke dipilih parti ba pengerami ti udah digulu urung 121 iku tuai rumah ari kandang menua nya.
Entara ketuai PDP ke bisi datai ke pengerami nya Menteri Muda Kaunsil Kandang Menua enggau Pengawa Berumah Datu Dr Penguang Manggil, ADUN Tasik Biru Datuk Henry Jinep enggau Residen Betong Friday Belik.
Sama bisi datai mega dua iku chalun ti nyangka deka bediri di sitak nya Subeng Mula enggau Dr James Chella.
Naka ke diatu, ketuai ejen ngundi di sitak parlimen Saratok Rolland deka nerima geran ke dipansutka Opis Menteri Besai sepenyampau RM4 juta ke udah diagihka ungkup kandang menua nya, ku Tiong.
Ku iya nambah, RM1 juta udah diberi ngagai Rolland ngambi diagihka ngagai semua Komiti Pemansang enggau Pengelikun Genturung Pendiau (JKKK) rumah panjai di Saratok iya nya ba sitak Krian, Kalaka enggau Kabong.
Iya deka nyuaka laluh RM3 juta enda lama agi, lalu iya mega ngarap ngambika bala pengundi di Saratok ulih ngenang pemansang ke udah dibai perintah BN sereta meri sukung ti enda bebagi ngagai BN maya PRU14 ti deka datai.
Tiong mega udah madahka pemeri sepenyampau RM20,000 ngagai JKKK Rumah Jabu dikena mantu sida mayar ungkus ke udah dikena bejalaika program nya.
Rolland lebuh ti meri jaku pengelalu meri terimakasih ngagai 121 iku tuai rumah ke udah ngelimpangka awak ngulu pengerami nya, tang taja pia berasai sinu laban bisi sekeda tuai rumah enda ulih ngenataika diri ke program ti udah diatur perintah BN.
Pia mega, sida nya udah dikangau ketegal dipinta ngerika rumah panjai ngambi geran ke udah diagihka ungkup nembiak redak sida.
Rolland mega ngarapka tetiap tuai rumah ulih bekerejasama enggau perintah BN nyengkaum ketuai sereta menteri ari PDP ke mega siti ari parti komponen.
Iya ngelalau sida ngambika datai ke ofis parti dikena meri lumur akaun ngambi ngemudahka pengawa meri geran.
Dr Penguang ti mega diberi basa bejaku ba pengerami nya mega madahka serebana ati ke sebaka ti ditapi enggau ketuai komuniti ba sitak dipegai iya lebuh ti bepilih ba Pengawa Bepilih Nengeri (PRN) bedau lama.
Taja pia, iya andal ketuai komuniti dia diatu udah sedarka penyalah lalu deka meri kerejasama pengudah iya menang nyadi ADUN, ku iya.