Peranak Rh Dilang Ng Tau udah nerima bantu pemakai ari JBPM
BINTULU: Bekal pemakai ungkup peranak ti napi penusah ampuh bah udah dianjung lalu diagih raban Ofis Bomba enggau Penyelamat Malaysia (JBPM) nengah perengka pengangkut langit kemari ngagai peranak di Rumah Dilang Nanga Tau, Tatau.
Bantu nya diberi ngagai palan ti udah dituntung penusah ampuh bah bedau lama ti udah kelebih agi kandang menua pesisir ke jauh sereta tusah deka dilawa nengah jalai darat.
Komander Operasyen Zon Bintulu PPgB Mohd Irwin Abidin madah, pengawa nganjung bekal pemakai nya digaga tiga kali dikena ngagih bekal pemakai ari Balai Lumba enggau Main Tatau ti ngembuan pemerat 800 kilogram (kg) ke pengawa nganjung keterubah, lalu nangkan ke nya dua kali proses nganjung enggau pemerat 1,400 kg ngena helikopter JBPM.
“Keterubah nganjung kemari ngena penerebai ketebuah udah berangkat kena pukul 2.45 lemai lalu datai di palan din pukul 3 lemai. Semua bekal pemakai nya udah diagihka ngagai 342 iku peranak rumah panjai 17 pintu nya,” ku iya madah kemari.
Raban ti udah ngaul diri enggau pengawa tu iya nya Ketuai JBPM Zon Bintulu PgKB II Unjar Lum, Ketuai BBP Tatau PPgB Nazari Harun, tujuh raban unit langit bomba, dua pemesai polis, siku staf Opis Pengintu Pengelantang Pendiau Komuniti (JKM) enggau siku staf Opis Pelilih Tatau.
Kemari bekal pemakai pengudah nya lalu dianjung enggau helikopter ke palan ti sama.
Juruterebai helikopter iya nya Mejar Zahrolayali Abd Talib ti mega disaup juruterebai pertama Leftenan (Lt) Kolonel (Kol) Rosli Hashim enggau Lt Kol Khairul Anuar Shamsudin Sereta injinir bilun PPgB Norameli Ramlee.
Kelimpah ari nya, sama bisi meri bantu dalam operasyen nya 29 iku pemesai enggau raban bomba, nyengkaum PDRM, JKM enggau staf ari opis pelilih Tatau.
Peranak ke udah napi penusah tu beterima kasih ngagai bantu ke udah diberi piak perintah nengah kerejasama JBPM, PDRM, JKM sereta opis pelilih ke udah ngelempungka tating penusah sida kelebih agi sentang perengka ke diguna sehari-hari.