Gerempung RPJ ngelalau bansa Dayak nyereta Pekit Ngaga Baju Ujan

B I N T U L U : R a b a n pengemeran main asal Iban kelebih agi bekaul enggau asil pengelandik jari iya nya Raban Pengelandik Jari (RPJ) ngelalau semua peranak di nengeri tu ti bebensa Iban tauka Dayak ti ngembuan pengelandik sama ngulu Pekit Ngaga Baju Ujan tauka Dujong Marik.

Penyanding Penemu RPJ, Sandine Bennedict madah, tu pekit ti keterubah ke bekaul enggau ngaga ngepan Dujong Marik ti asal nya datai ari Batang Rajang.

“Aku ngelalau semua raban ti bisi pengelandik sama enggau pekit tu ngambika ulih ngangkat sereta ngetanka ngepan asal kitai Iban ti bebida nitihka penatai kitai.

“Ngepan tu suah agi dikena sida ke diau di Batang Rajang, lalu jarang sekali diayan ti ngujungka ngepan tu nyauka lenyau diserunyut jeman,” ku iya bejaku enggau pengarang berita bedau lama.

Bekaul pekit tu, tetiap penyereta dipinta mayar RM100 lalu pesereta dikemendar ngena manik gelas, manik plastik, kerubung tekuyung sereta ke bukai.

Pekit renggat final tu ila iya nya tetiap pesereta dipinta mantaika asil sida maya Pengerami Makai Lemai RPJ ti deka diatur kena 28 April ti deka datai.

“Semua pesereta ti masuk renggat final deka ditangkan lalu sida dipinta mantaika asil sida maya pengerami makai lemai RPJ. Maya nya ila, sida dipinta mai model kediri empu ti deka ngerasukka ngepan Dujong Marik ke digaga sida,” ko iya nandu.

Champion pekit tu deka mai pulai mata duit RM700, penuduk lumur dua (RM600) lalu ba lumur tiga (RM500) sereta bela deka nerima trofi enggau setipikit.

Penerang ke silik tau betelefon ngagai Sandine ba lumur 019-4833 078, Rickeers (016-8793 034) enggau Rosita (013-5745 681).