Semua langgur penemu deka diperunding sereta diserenih: Uggah
KUCHING: Sapit Kepala Menteri ti mega chairman raban Pengereja pengawa bekaul enggau tanah adat Bumiputera, Datuk Amar Douglas Uggah Embas lebuh ke bejaku ba aum Pemakai Menua enggau Pulau madahka mayuh NGO minta deka enggau ngulu aum tu, tang enda semua ulih dikangau ngulu aum nya.
“Kami nerima mayuh langgur penemu ari NGO/korporat sereta ejensi, ke diterima sereta diserenih kami.
“Nya alai langgur penemu ke bisi diberi NGO/korporat/ ejensi deka diperundingka kami, tang aum tu semina ungkup ketuai pupu raban bansa,” ku Uggah.
Aum nya diatur perintah nengeri begulai enggau Majlis Adat Istiadat Sarawak (MAIS) sereta Institut Pemansang Sarawak (SDI) berengkah ari 24-25 Januari 2018 di sebuah hotel ditu.
Berebak enggau nya, aktivis Peter John Jaban enggau sekeda pengarang berita ke enda direjista ari baruh Opis Pemadah, enda di asuh tama ngagai balai alai ketuai pupu raban bansa nya baum.
Taja pia, Ketuai Parti Keadilan Rakyat (PKR) Baru Bian ti mega nyadi champion ba kes tanah adat ba kort di menua tu dikemendar enggau ngulu aum nya.
Sama bisi enggau ngulu aum nya kemari, Sapit Kepala Menteri, Tan Sri Datuk Amar James Masing, Datuk Amar Awang Tengah Ali Hasan, Speaker Datuk Amar Asfia Awang Nasar, Sekretari Perintah Nengeri, Tan Sri Datuk Amar Morshidi Abdul Ghani, Sapit Sekretari Perintah Menua, Datu Jaul Samion, Chairman Opis Majlis Adat Istidat Sarawak (MAIS),menteri muda, kaban kunsil nengeri sereta menteri kabinet.