Tu seriris enggau 2018 nyadi taun ngenegapka raban orang indu
SEBUYAU: Raban orang indu diperansang ngena memanah perengka guna ti udah disediaka perintah ungkup sida ba tuju ngenegapka agi pangku pengawa sereta nyungkak tikas ekonomi raban nya.
Menteri Pemansang Orang Indu, Ruang Bilik enggau Komuniti, Datuk Seri Rohani Abdul Karim madah seriris enggau 2018 nyadi taun ngenegapka raban orang indu, endang patut sida tu ngena semua awak ke bisi disediaka perintah.
“Nyadi menteri megai tangungpengawa ngagai raban orang indu, aku dekaka sida di menua tu nyikap diri empu tegap agi nengah kaul ba mayuh macham program ti deka dipejalaika perintah,” ku iya.
Iya ke mega Kaban Parlimen ( MP) Batang Lupar mansutka jaku nya lebuh bejadika Rumah Komuniti Indu Kampung Arus Iban,
Datuk Seri Rohani Abdul Karim Menteri Pemansang Orang Indu, Ruang Bilik enggau Komuniti
Sebuyau semak ditu.
Rumah Indu didiri di genturung pendiau tu nyadi Projek Mesra Rakyat (PMR) di baruh agih belanja Parlimen Batang Lupar enggau ungkus penyampau RM50,000.
Rumah tu udah tembu dalam bulan November taun nyin tadi, iya digaga khas ungkup raban indu di menua nya, ngatur aktiviti ti diperambu serakup enggau gerempung sida, ba sebarang pekara dikena mansutka ekonomi enggau nambahka penemu sereta pengelandik sida dia.
Ku Rohani nambah, raban indu patut ngena memanah perengka guna ti udah digaga lalu anang masau iya ti udah disediaka perintah.
“Pemansang deka seruran dipejalai perintah Barisan Nasional (BN) dikena mantu rayat nyingkang mansang ke mua, ngaga infrastruktur ti deka pulaika pemaik rayat,” ku iya nerang silik.
Sama bisi datai Chairman Lembaga Penduduk Pembangunan Keluarga Negara (LPPKN) Msia, Datuk Mariam Mas, bala pemesai kanan ari KPWKM, ketuai raban bansa sereta bala bukai.
Berebak enggau program nya, Rohani mega bisi ngemendarka agih belanja penyampau RM10,000 ngagai Gerempung Serakup Indu Sarawak (PPWS) Kampung Arus Iban dikena bebelika kereban khas ungkup rumah komuniti nya.