Perintah Nengeri mega ngembuan komiti ke chukup dikena mutar dedini endur tasah bah ke nyadi ditu
SANTUBONG: Perintah Nengeri ngembuan perengka guna sereta kaban komiti ke chukup dikena mutarka tasah bah ke nyadi ditu, ku Sapit Kepala Menteri, Datuk Amar Douglas Uggah Embas.
Iya madah, perintah nengah Komiti Pengatur Tasah Nengeri tauka JBPN seruran nyikap diri lebuh napi sebarang tasah ke deka nyadi.
“Ninting taun, kami ( JBPN) seruran nambah perengka guna tauka bantu kami ba pengawa mantu sida ke napi penanggul ampuh bah di menua tu, nyengkaum baka kediatu lebuh napi gaya ke bansa tu.
“Tu semua asil kerejasama ke tegap entara semua ejensi ke bisi disengkaum dalam komiti, mantu ngurangka penusah sida ke napi tasah bansa tu. Kami ngarapka kerejasama tu deka dipajakka datai ke jemah ila,” ku iya.
Iya madah munyi nya, lebuh dikerandau ulih pen- garang berita lebuh ngelawa Palan Pengentap Sementara (PPS) di Masjid Darul Mustaqin Kampung Buntal ke alai urung 130 iku ari 21 ruang bi- lik ke napi penanggul ampuh bah dipindahka, kemari.
Sama bisi enggau ngulu pengawa nya, Menteri Muda Elektrik Menua Pesisir ti mega nyadi Kaban Kunsil Nengeri ( ADUN) Pantai Damai, Dr Abdul Rahman Junaidi sereta pengari ari ijinsi ke enggau komiti tu.
Uggah ti mega nyadi chairman JBPN Sarawak madah, perintah menua deka beratika semua sida ke dipindah ngagai PPS deka nerima semua perengka guna ke patut.
Bepelasarka penemuai ngagai PPS sehari tu, iya madah iya tepantup ati beratika semua perengka guna ti bisi disediaka dipalan nya, nitihka atur ke patut.
“Kami deka beratika semua bantu pemakai, utai di irup diberi ngagai sida ke napi penusah tu.
“Kelimpah ari nya, Opis Pengerai Nengeri Sarawak mega bisi nganjung lutur sida iya meresa sereta beratika pengerai sida tu dijaga enggau manah,” ku iya.
Kelimpah ari nya, Uggah madah, naka urung pukul 12:30 tengahari kemari, nitih ku ripot ari JPBN Sarawak, urung 554 afri 158 ruang bilik, ke napi penusah tu dipindahka ngagai lapan PPS ke nyengkaum Pelilih Menua Kuching, Samarahan enggau Serian.