Tusu tubuh pemadu manah ungkup anak mit baru ada
KUCHING: Perintah Nengeri nengah Opis Menteri Pengelantang Pendiau, Komuniti, Orang Indu, Raung Bilik enggau Pemansang Anak Mit (KKKWKK) meransang sida indu ke baru udah beranak, patut nusuka anak sida iya dalam kandang enam bulan.
Menteri opis nya, Dato Sri Fatimah Abdullah madah pengawa tu meransang bala indai nusuka anak sida iya, enda ngena tusu formula anak mit (tusu tepung) dalam kandang enam bulan.
“Ba pengawa opis menteri kami, ngelalau sereta meransang indai nusuka anak sida eksklusif (nadai ngena formula anak mit) dalam kandang enam bulan.
“Tusu indai entara tusu ke pemadu manah, ari sukut pemanah (nutrition) sereta kaul entara indai enggau anak.
“Kaul ari pengawa nusuka anak berat endar laban seumur pendiau sida iya datai, kaul nya terit entara anak enggau indai datai ke jemah ila,” ku Fatimah.
Iya madah munyi nya lebuh bejaku ba aum pengarang berita pengudah muka Tulip Mama House, iya nya palan alai indai-indai ke baru udah beranak, bepantang di palan nya dalam kandang sebulan.
Palan Tulip Mama House ngembuan 16 buah bilik, ari bilik biasa ngagai bilik VIP ke ulih alai indai-indai belelak pengudah sida iya beranak, nyengkaum palan nya mega nyaga anak mit ke baru ada.
Di palan tu mega, semua pengawa dalam kandang indai anak mit nya bepantang, dijaga ulih palan tu, nyengkaum semua pengelantang pendiau indai sereta anak mit nya dalam timpuh sida iya bepantang.
Lalu baka nya mega, servis ti disediaka di palan tu, ukai semina ari sukut fizikal, tang ari sukut pemakai ke bepengerai, mulaika pengering sida iya, sereta gaya palan ke ngipak endur indai orang ke udah beranak belelak.
“Nya alai, kami sigi ngelalau indai- indai ke baru beranak, nusuka anak sida iya dalam kandang enam bulan, lalu ngarapka palan tu mega deka meri peransang ngagai indai-indai ke baru beranak, nusuka anak sida.
“Ba sentang tu, pengelandik indu misi berat endar, ngajar indai-indai baru, ngajar sida iya bakani ku nusuka anak sida, laban peneleba ke di asai sida iya, siti peneleba ke manah ba indai anak mit,” ku iya, ke muji palan nya dibuak di menua tu laban tu ke nyadi pemungkal palan bansa tu dibuka di menua tu.
Bekait enggau pekara tu mega, Fatimah nandu baru madahka di mengeri, sigi bisi pemerat muka servis bansa tu, alai indai ke baru udah beranak, bepenti kelimpah ari ngibun anak mit ke baru ada.
“Laban kemaya hari tu, enti diperatika ari sukut tusun diri sebilik, udah berubah.
“Enti kelia tauka suba, kitai bisi apai indai, entua, menyadi tauka ipar ke ngibun kitai.
“Lebuh indu beranak, sigi bisi ssstem sukung ke nyaga indai ke baru beranak, tang diatu enti kitai ke ngiga ruang bilik bansa tu, sigi pedis,” ku iya.
Ketegal tusunruang bilik udah berubah, kelebih agi indai-indai orang enggau sida sebilik pindah ke mengeri ari genturung pendiau sida iya, laban gawa di mengeri.
“Suba, lebuh indai orang baru beranak, sida iya pulai ke kampong beranak, tauka beranak dulu lalu udah nya pulai ke rumah panjai tauka apai indai ari rumah panjai nurun ke mengeri nyaga anak tauka menantu sida iya (enda lama) ke beranak.
“Tang pengawa bansa nya, makin nadai, nya kebuah bisi pemerat ngembuan servis bansa tu, nyaga indai ke baru beranak nyengkaum anak mit ke baru ada,” ku iya.
Iya nandu baru madahka perintah pan nemu sereta mereti pemerat ke ditapi ulih ruang bilik lebih bini tauka indai orang beranak, alai perintah pan ngemendarka apai orang bela kemisi, ngambika bisi awak mutar sereta mantu ruang bilik sida iya empu.
“Kita (laki) pan betatika pemerat tu, bisi pemerat baka kemaya hari tu, laban rangkah ( struktur ruang bilik) ari ruang bilik ke besai ngagai ruang bilik ‘nucleus’ udah berubah,” ku iya.
Fatimah mega ngarapka palan tu mega bisi nyendiaka servis luar ari palan nya empu, iya nya servis ngagai rumah ke rumah (indai-indai orang ke bisi beranak tang enda diau di palan nya).
“Enda semua indai orang tu ka jauh ari rumah sida iya empu, bisi mega pemerat orang ke nyaga orang bepantang di rumah sida iya empu.
“Nya alai, ngarapka palan tu jemah ila, bisi nyendiaka servis nyaga indai orang beranak nyengkaum nyaga anak mit ke baru ada dalam timpuh ke patut, laban trend bansa tu pan majak nambah,” ku iya.