Malam Main Asal Nembiak SDNU dirichah enggau bemacham aktiviti
KUCHING: Malam Main Asal Bagi Nembiak SDNU 2018 ke diatur di sebuag hotel ditu malam ensanus dirichah enggau aktiviti mandangka main asal bansa Dayak.
Pengerami digulu Temuai Dipebasa Menteri Muda Industri enggau Beranakka Puku Malcolm Mussen ti ngarika Sapit Kepala Menteri Tan Sri Datuk Amar Dr James Jemut Masing.
Gerempung bukai ti bela ngembuan pengeran ngenan sereta ngangkatka main asal Dayak baka ke Serakup NGASI Sarawak, Akademi SADIA, Gerempung Kuntau Iban Sarawak(SIKAR), Serakup Indu Dayak Sarawak(SIDS), Gerempung Nembiak Dayak Sarawak(PEBEDAS) sereta Gerempung Dayak Graduet Sarawak(SDGA) bela datai meri sukung.
Kelimpah ari nya, Malam Main Asal nya matak raban ari Sarawak Arm Sport Association, Malaysian StrongMan Association(Sarawak) enggau Kelab Badminton Kenyalang Seraban.
Mussen ba jaku bejadi pengerami meri puji ngagai pemanah pengawa Bagi Nembiak SDNU ti ngembuan kaul ke rat enggau mayuh bengkah gerempung sereta ejensi.
Ku iya, kaul enggau kerejasama nya udah nentuka gerempung ngereja pengawa enggau mudah kelimpah ti bela ulih ngerebut peluang ke bisi ayan ke tau nyaup ngerembaika gerempung.
“Seiku kitai engka enda ulih ngereja mayuh pengawa tang enti kitai bisi gempung ke besai, kerejasama nya deka nentuka kitai ulih ngemujur semua pengawa ke dikereja,”ku Mussen.
Mussen ba pengerami nya besemaya ngagihka geran perintah ba penyampau RM15,000 ngagai Bagi Nembiak SDNU.
Tukang Pekara Wang SDNU ke mega ADUN Tamin Christopher Gira ke bela datai bela besemaya ngagihka geran perintah penyampau RM10,000.
Dulu agi ari tu, Bagi Nembiak SDNU ti betuaika Churchil Edward Drem nerima RM15,000 ari Masing.
Churchil ke nyadi Chairman Pengatur Pengawa ba jaku pengelalu madah Bagi Nembiak SDNU ke ditumbuhka ba bulan Mei 2015 seruran meri sukung ngagai polisi enggau program perintah.
Ku iya, sebaka enggau gempung besai (SDNU), Bagi Nembiak SDNU nguna chara numbas iya ba atur mutarka pemar ke bisi ayan.
Malam Main Asal SDNU 2018 dipungkal enggau tabuh gendang pampat dikena ngambat penatai Mussen ke disempulang enggau Kuntau Iban sereta Ajat Ngalu Temuai.
Serakup NGASI Sarawak, Akademi SADIA enggau Gerempung Kuntau Iban Sarawak (SIKAR) bela mandangka main asal baka ke tebah sape, tanda ajat enggau Kuntau Iban ari raban Guro SIKAR.
Raban ari Sarawak Arm Sport Association bisi mandangka demonstrasyen main bibat lengan.
Main asal Iban Batak Lampung ke udah jarang dipeda bisi mega dipandang sereta dipekit malam nya.
Pengerami mega ngundang Kaban Kunsil nengeri ( ADUN) Batu Kitang Lo Khere Chiang ke alai iya bisi nyuaka cek ngagai pengari sekeda gerempung baka ke Pebedas, Sadia Kuching, SDNU Taman Malihah enggau SIKAR.
Bela datai Panglima 1 Divisyen- Mejar General Datuk Stephen Mundaw, Penyanding Penemu Sarawak Arm Sport Association Datuk Seri Teng Chi Lik, Sekretari Politik(Kepala Menteri) Alexander Asing, Mandal Presien SDNU Dr Gluma Saban, Presiden SADIA Sidi Munan, Chairman Malaysian StrongMan Association(Sarawak) ASP Ricky Poh, Sekretari Besai SDGA Bunie Japah enggau orang bukai.