Sistem perengka pengangkut sungai deka dikemanah
SARIKEI: Pelin besai baru dikena ngemaruka sistem perengka pengangkut sungai ti udah bisi dalam langkar Opis Menteri Perengka Pengangkut.
Mansutka pekara tu, Menteri Muda opis menteri nya, Datuk Dr Jerip Susil madahka tu pelin timpuh panjai dikena ngangkatmanah infrastruktur ke bisi di serata nengeri ti diperatika iya udah kelalu lama.
Tu ukai semina dikena nentuka pengelikun enggau orang tambang perengka pengangkut sungai aja, tang ungkup pengelantang sida mega, ku iya lebuhka dirandau pengarang berita rambau pejalai gawa ngabas Palan Penyangkai Ekpres Sarikei, ditu kemari.
Tu mega pekara nyata ke alai perengka pengangkut sungai agi bejalaika pangku pengawa beguna endar di nengeri tu taja bisi sambung jalai ti meruan agi sereta mega servis perengka pengangkut langit, ku iya nambah.
Berindik ari gaya pendiau di nengeri tu, perengka pengangkut sungai agi beguna en- dar laban tebal agi peranak agi milih iya nyadi chara mindah ari menua siti ngagai menua ke bukai sereta ngangkut barang sida.
Taja pia, nadai entu mayuh orang ibuhka pelan besai baru tu laban iya agi ba renggat baru, ku iya, seraya nambah, iya agi begunaka mayuh penemu ari raban perunding bekaul enggau mayuh bengkah pekara teknikal baka hidrologi, tanah enggau alir ai tauka ke bukai.
“Reti jaku ke bukai, kitai agi beratika nama enggau baka ni dermaga tauka palan penyangkai nitihka pematut dudi hari.
“Semua perengka guna di palan penyangkai deka dikemaru, semua bot penambang mega dipinta ngena sistem tu,” ku iya nangkan.
Ba lansa ke bukai, Jerip ke dulu ari nya ngulu pengawa meri penerang pasal pengawa ngintu Palan Penyangkai I di bilik konforen Opis Residen Sarikei, madahka kesemua penyampau RM850,000 udah diagih dikena bejalaika pengawa ngemanah.
Nitih ku iya, RM750,000 dikena nukar semua pontoon lalu siti lupak jalai ti runtuh dalam beberapa bulan ke udah.
Seraya RM100,000 da agi dikena muai latak di tebing sungai di palan penyangkai nya, ku iya nambah.
Pengawa ngintu Palan Penyangkai I deka berengkah enggau pengawa nyerahka kunterik kena 7 Febuari tu lalu dipelaba deka tembu dalam timpuh semilan bulan tauka datai ba bulan November taun tu, ku iya.
Nya alai, semua bot penambang dipinta ngena Termina II dulu ngambi enggau nyangkaika orang tambang sida dalam timpuh nya.
Antara bala bisi nyempulang pejalai Jerip iya nya Pemangku Kontroller SRB Acting Abang Mohammad Abang Naili, Sapit Residen Sarikei Abang Mohd Porkan Abang Budiman, Penulung Kontroller SRB Region II Sibu Hatta Morshidi, Injinir Bagi Menya Opis Kereja Raya (JKR) Sarikei Teo Nguong Leong sereta Pemesai Pelilih Sarikei Christopher Ranggau.