3,358 iku ukui di Sibu udah dituchuk enggau vaksin rabies

SIBU: Naka kilah ensana sepenyampau 3,358 iku ukui di Sibu udah dituchuk enggau vaksin rabies.

Kemari, pengawa nuchuk vaksin tu ti dipejalaika tim pemunas rabies Sibu diatur sepiak librari SMC, Jalan Keranji ditu.

Menteri Muda Pengawa Berumah enggau Pengerai Mensia Mayuh Dr Annuar Rapee kilah ensana madahka tim pemunas rabies Sibu tu diatu mujur ngatur program nya ti deka ngelawa perambu 70 peratus semua ukui di Sibu dituchuk vaksin.

“Keterubah ngatur kimpin penyakit tu suba mensia mayuh empai tentu ngibuhka.

“Pia mega beribu- ribu iti surat sentang penyakit nya disadung ngagai mensia mayuh baikka ba sebelah kedai kupi tauka ba pasar.

“Tuju kitai ngambika mensia mayuh lengkas nganjung ukui sida dituchuk vaksin rabies,” ku iya sambil madah penerang nya mega bisi disadung ngagai 160 buah sekula ba sitak Sibu.

Program nuchuk vaksin rabies udah diatur di Sibu kenyau 20 Januari suba lalu penyampau ukui ke dituchuk majak nambah.

Program enda bebayar tu diatur ba 29 bengkah endur ti nyadi sebagi ari chara dikena nentuka sitak Sibu likun ari penyakit rabies.

Kena 6 Feb tu program nya deka ditandu ba Bowling Centre, Jalai Perpati, Dewan Suarah Sibu (7 Feb), Hing Hua Memorial Park, Taman Seduan (8 Feb), Sungai Merah Heritage Walk (10 Feb) enggau Kedai Taman Kenari (10 Feb).

Minggu nangkan nya, program nya deka diatur ba Rumah Andrewson, Sekuau (12 Feb), Tamu Stapang (13 Feb), Balai Mensia Mayuh Stapang ( 14 Feb) enggau Rumah Gangsau Antas (15 Feb).

Program nya bela ditandu ba Giant Supermarket (20 Feb), Unicity ( 21 Feb), Kelinik 1 Malaysia Teku (22 Feb), Librari Rantau Panjai (23 Feb), simpang Kelinik 1Malaysia/Kedai Ling Kiat Sung, Sungai Bidut ( 24 Feb), Kedai Tu Chong Gin, Empawah (26 Feb), Librari Bawang Assan (27 Feb) enggau Lake Garden, Permai (28 Feb).

Penerang silik bekaul enggau program tu tau ditanya nengah lumur 013-8077964 tauka 084-310808.