Program nyual barang diguna tetiap hari rega murah nerima timbal ti manah
BINTULU: Pengawa dipejalaika perintah ngatur program bejual barang diguna tetiap hari enggau rega murah diperati manah endar lalu program tu dikearap ulih diatur ninting taun dikena mutarka tating belanja idup rayat.
Siti ari pengawa dipejalaika perintah iya nya bejalai sereta ngelancharka Program Jualan Sentuhan Rakyat (PJSR) ti diatur di Kampung Jepak ditu, kemari.
Siku peranak lebuhka dirandau, Norhayati Noh madahka, enti ulih diatur ninting taun laban tu keterubah iya sida ke diau di Jepak ngaul diri ba program nya.
“Maya program tu diatur suah agi tauka sekali setaun, ukai semina kami aja ulih meli barang enggau rega mudah, tang tu ulih ngerapitka kaul antara peranak,” ku iya lebuhka dirandau Utusan Borneo rambau pengawa ngelanchar PJSR di Arena Pentanque Jepak ditu, kemari.
Ku iya, pengawa bejualka barang bansa tu dipejalaika pengari rayat endang jarang dipeda lalu enti di kedai nyangka deka mar agi.
“Tu keterubah iya dalam idup aku meli barang ngena rega mudah ari ke selama, baka minyak makai kambut dijual enggau rega RM2.40 sekambut udah dikurang ngagai RM1.40 sekambut,” ku iya.
Penemu tu mega disukung siku da agi peranak, Beri Jawi ti madahka enti ulih taun baru deka diatur baru, besai agi ari taun tu.
“Aku meri terima kasih ngagai MP Bintulu, Datuk Seri Tiong King Sing mantu sereta ngatur program ke ban- sa tu dikena ngelempungka tating rayat, bebelika barang diguna enggau rega mudah agi,” ku iya nambah.
Berebak enggau nya, Rabiah Kamri ari Kampung Warisan Jepak madah, iya gaga endar laban rega ‘runtuh’ enggau mudah barang diguna tetiap hari bisi dijual ngagai peranak di Kampung Jepak.
“Aku meri terima kasih ngagai Datuk Seri Tiong ti udah gawa ngelempungka tating penusah rayat. Rega barang ti dijual enggau rega patut lalu semua peranak teulihka pemaik ari iya,” ku iya.
Nya alai ku iya, sida ngarapka prpgram tu deka diatur baru dikena mantu rayat, kelebih agi sida ti ditating belanja idup tinggi ditu.
Antara barang diguna besehari sehari bisi dijual dalam PJSR iya nya sardin sos tomato (dalam tin) bela berega RM1 dan RM2.35 cap Cinta enggau KingCup, Milo 400 gram (g) (RM7.80) enggau RM17 1 kilogram, susu pekat manis 500g (RM1.85 cap OKI) enggau RM2 cap GoldCoin, sos chabi cap Jalen enggau Life 340g bela berega RM2.50 enggau RM3.10.
Pusu 1kg (RM23), karot (RM3.20), kubis (RM1.80), kentang (RM2.20), chabi mirah (RM17.50), chabi rangkai ( RM12), halia ( RM7.20), bawang besai (RM3.20), bawang mirah (RM13) enggau tomato (RM7) bela pemerat 1kg, manuk udah dibela 1kg (RM6.99), seset telu gred c(RM8.50), sekambut berau 10 kg cap 3A BOY (RM23.50), minyak makai 1kg (RM2.40), gula 1kg (RM2.80) enggau tepung 1kg (RM1.15).
MP Bintulu, Datuk Seri Tiong King Sing bisi bejalai ngabas rega rambau program nya minta beberapa barang dijual mudah agi nyengkaum milo 400g (RM7.30) enggau 1kg (RM16), berau (RM22), tepung (RM1), ikan kembung (RM6 dibida RM8 sebedau nya), telu manuk (RM7.50), minyak makai ( RM1.40), kentang 1kg (RM1.70), bawang besai (RM2.70) enggau manuk udah dibela (RM6).