Pengawa nyeruri semua perengka guna di pesisir benung dipejalai
SARIKEI: Pemerat ba pengawa nyeruri semua perengka guna pemun enggau infrastruktur, kelebih agi di kandang menua pesisir diatu benung chakah dipejalaika perintah, pia ku Sekretari Politik Kepala Menteri, Teng Ung Woo.
Ku iya, pengawa tu begunaka sukung enggau kerejasama ari semua raban dikena nentuka tetiap pengawa ti udah dilangkar ulih pulaika pemaik ngagai semua lalu bejalai baka ti udah diperambu sereta ditimpuh.
“Diatu, perintah Barisan Nasional (BN) meri pemerat ba pemansang enggau kereja nyeruri perengka guna pemun di semua kandang menua di nengeri tu, kelebih agi ngaul perengka guna bala jalai alun, bekal ai beresi, bekal kuasa karan enggau mega sekula.
“Nya kebuah, ninting taun perintah udah ngagihka belanja besai ba pekara tu, enggau tuju nentuka tetiap iku rayat ulih ngasaika semua perengka guna enggau lantang,” ku Teng rambau atur pejalai gawa ngagai sitak Meradong, semak ditu, kemari.
Rambau pejalai gawa nya, Teng udah ngabas Rumah Jerome meda kandang genturung pendiau ti napi penanggul bekal ai beresi begulai enggau Pemesai Opis Bekal Ai Menua Pesisir (JBALB) Sarikei, Chieng Kuok Hieng.
Berebak enggau nya, Teng mega bisi nyuaka pemeri nengah Program Touch Point ngagai peranak Rumah Jerome, Meradong.
Kenu ku Teng, program transformasyen benung chakah dipejalai perintah kenyau ari beberapa taun ke udah nyentuk diatu, udah nyata mayuh mai pemaik ngagai peranak di kandang menua pesisir.
“Semua perambu ti dipejalai tu nyadi pengawa perintah ngenyemakka takah pemansang di antara kandang mengeri enggau menua pesisir.
“Lalu semua perambu tu udah dipejalai berenggat, bepanggai ba pemerat enggau peminta komuniti,” ku Teng nerang.
Pekara tu mega ku iya, nyenggala ngayanka perintah BN endang keran gawa negika nasit enggau hak semua bansa, nadai ngira pegai politik sida.
“Pengawa nyadi ketuai ke bansa tu patut disukung kitai, pulaika pemaik enggau penguntung ngagai semua raban, kelebih agi peranak di nengeri tu,” ku teng nandu nyemetak.