Penguang datai ngabas Rh Langat seraya nyuaka tulung tasah angus

MARUDI : Menteri Muda Kaunsil Kandang Menua, Datu Dr Penguang Manggil disempulang bala bukai apin lama ke udah bisi ngatur pejalai gawa enggau nganjung bantu ngagai Rumah Langat di Nanga Majang, Tinjar ti udah dituntung penusah angus kena 31 Januari tu tadi.

Nitih ku Penguang ke mega Kaban Kunsil Nengeri ( ADUN) Marudi, Raban Nyaga Pengelikun Mensia Mayuh Malaysia (APM), Opis Pelilih Beluru enggau raban Opis Bomba enggau Penyah Penusah sereta Opis Pengintu Pengelantang Mensia Mayuh ( JKM) Bagi Menua Miri, udah bejalaika pangku pengawa sida empu, mantu sida ti tasah sereta nyuaka bantu penusah ngenyit.

“Tuju pejalai aku sehari tu (1 Febuari) deka nyuaka bantu mata duit penyampau RM10,500 (RM500 sepintu) ngagai kita ti tasah angus nengah ketuai kita, Tuai Rumah (TR) Langat Anthony Collin,” ku iya.

Nitih ku penerang diberi ngagai Utusan Borneo, sebagi ari sida ti tasah udah diasuh diau ngenduh di balai Sekula Primari (SK) Kuala Bok, seraya sida ke bukai diau ngenduh di Balai Gerija St.Anthony di Pujut Corner, Miri.

Berindik ari nya, Penguang mega meri jaku peransang ngagai sida ti tasah ngambi liat ati napi penguji ke enda disadang.

Bela nyempulang Penguang dalam pejalai nya iya nya Pemesai Pelilih Beluru, Mohd Rashdan, Chairman Kaunsil Pelilih Marudi ( MDM), Edward Mendai sereta bala ketuai raban bansa di menua nya.

Kelimpah ari Penguang, Kaban Parlimen ( MP) Baram, Anyi Ngau mega bisi nyuaka bantu penusah ngenyit baka barang pemakai enggau gari ngagai sida ti tasah angus.

Kena 31 Januari tu tadi, sebuah blok 21 pintu bilik ari Rumah Langat udah angus lengis ngujungka lebih 100 iku semina tinggal gari ba punggung aja.