Raban DTTG Miri, MP Miri meri basa kepenudi ngagai niang Juan
MIRI: Berita sinu nuntung Juan Jangga, ti tasah angus, midang pengudah napi penanggul ba tungkul sengayuh, dipelaba kelalu kesal ati meda rumah panjai iya angus dalam penusah penusah nyadi apin lama ke udah, mega nerima perati ari sekeda raban.
Chairman Raban Pemikir Dayak ( DTTG) Pampang Miri, Elias Lipi Mat enggau sapit iya, Philip Asry, disempulang Pembantu Khas Kaban Parlimen (MP) Miri, Dr Michael Teo, Peter Bong ti ngarika MP Miri nya, ngelimpangka diri ngabas sida niang sebilik seraya nyuaka tulung rabat enggau pemeri ari kuchik sida empu.
Nitih ku Elias, tuju pejalai sida sebuat dikena meri basa kepenudi ngagai niang, diatur di Balai Gerija St. Anthony di Pujut 1, semak ditu.
Niang udah ditumbak di Pendam Dayak Lambir ditu.
“Taja tulung tu nyangka enda mayuh tang dikearap ulih ngelempungka tating penusah sida sebilik ti tusah ditinggalka niang,” ku Elias.
Sida sebuat mega bisi limpang berandau enggau sida niang sebilik meri jaku peransang enggau lalau ke patut ngambika liat ati napi penguji pengudah pemidang niang.
Ba penusah angus ke nyadi kena 31 Januari tu tadi, rumah panjai Rumah Langat, Nanga Majang, Tinjar, pemanjai 21 pintu bilik, udah angus lengis diempa api.
Niang Juan, 57 taun, madamka seput pengudah luput lebuh nguji ngelarika diri rambau penusah nyadi.
Nitih ku penerang, niang baru mulaika diri ari Miri pengudah nerima perubat lima malam di Sepital Miri laban bisi penanggul ba pengerai ti ditapi iya.