Kastam mujur ngumpul chukai RM58.82 bilion ba 2017

KUCHING: Opis Kastam Diraja Malaysia ba taun 2017 mujur ngumpul chukai ba penyampau RM58.82 bilion, ku Ketuai Direktor Kastam Dato Sri Subromaniam Tholasy.

Ari penyampau nya ku iya, RM44.03 biliun tauka 75 peratus datai ari asil Chukai Barang enggau Servis (GST).

“Ba taun 2018, kitai nagit ulih ngumpul asil penyampau RM60.96 biliun, iya nya niki 4 peratus ari penyampau taun 2017.

“Chukai nyadi pekara berat ungkup tetiap menua lalu enti sistem ngumpul chukai eng- keman sereta manah, menua ulih nempa asil ke tinggi lalu dikena ba atur pemansang,” ku Subromaniam.

Iya mansutka jaku nya ba aum pengarang berita nyerumba Aum Direktor Kastam Se Malaysia di Hotel Hilton ditu, kemari.

Ungkup Sarawak ku iya, kelimpah ngumpul chukai, Opis Kastam mega ngintu pengelikun sereta bejalaika pengawa nyeliah orang mai barang chara belalai.

Nitihka penerang iya, Opis Kastam Sarawak nengah Unit Penerit Adat ba taun 2017 mujur ngerampas barang ke dibai chara belalai.

“Barang nya nyengkaum rukuk, ai bisa, mercun enggau bungai api ke berega RM20 juta ke alai chukai ba semua barang nya manggai RM53 juta,” ku iya.

Iya madah penyampau barang ke dirampas nya niki 267 peratus enti dibandingka enggau taun 2016.

Dalam timpuh ke sama, Bagi Penerit Adat Kastam Sarawak udah mujur ngerikod 613 kes ke mungkur bemacham penyalah nengah Akta Kastam 1967 enti dibanding 549 kes, tandu Subromaniam.