Pampang Nembiak PBB besemaya nentuka BN menang besai ba PRU14
KUCHING: Pampang Nembiak Parti Pesaka Bumiputera Bersatu (PBB) kemari besemaya deka ngenukuka Barisan Nasional (BN) kelebih agi PBB menang besai ba Pengawa Bepilih Besai Ke-14 (PRU14).
Ex Ketuai Nembiak PBB, Dato Sri Fadillah Yusof madah, Nembiak parti nya komited betemu enggau nembiak redak sereta nerangka polisi kelebih agi Ekonomi Digital ti dikemansangka Kepala Menteri ti mega Presiden parti, Datuk Patinggi Abang Johari Tun Openg.
Dulu suba maya Tuai Megai Menua (TYT) Tun Pehin Sri Abdul Taib Mahmud nyadi presiden parti ku Fadillah, Pampang Nembiak meri sukung tegap nengah ‘Gerakan Armada’ lalu pia mega maya dibaruh iring niang Pehin Sri Adenan Satem, Armada nengah mayuh misyen bejalai di serata nengeri laban deka ngenukuka BN menang ba pengawa bepilih nengeri sebedau tu.
“Lalu sehari tu, semaya Pampang Nembiak deka terus begulai enggau YAB Presiden kitai dikena nentuka Barisan Nasional (BN) ulih menang besai kelebih agi PBB ba PRU ke deka datai tu.
“Nya mih komitmen Pampang Nembiak sereta baka nya mega kelai sukung ngagai polisi ti dipejalaika YAB Kepala Menteri,” ku iya ba hari ke penudi mangku tanggungpengawa nyadi Ketuai Nembiak kemari.
Iya mansutka pekara nya dalam jaku pengelalu ba pengerami bejadika Aum Besai Pampang Indu enggau Nembiak Parti Pesaka Bumiputera Bersatu (PBB) Ke-14, ti diatur ba BCCK ditu.
Aum besai nya udah mujur dipenyadika Abang Johari.
“Kitai deka nentuka Nembiak nurun begulai enggau mensia mayuh nerangka polisi YAB Kepala Menteri ti mega presiden lebih agi bekaul enggau Ekonomi Digital sereta nengah pekara ti ditegi YAB deka nentuka kitai ulih ngambi pulai baru hak kitai dalamSempekat Malaysia 1963 (MA63).
“Kitai nyukung polisi dikena nentuka DBOS enggau PETROS mujur dipejalaika ke ulih mai pengelantang ngagai Sarawak,” ku iya ba hari ke penudi nyadi ketuai Pemuda mai Pampang Nembiak meri sukung ngagai iring Abang Johari.
Penuduk Fadillah ke nyadi Ketuai Nembiak deka diganti Gerald Rentap Jabu. Nambahka nya Kaban Kaunsil Besai Pampang PBB PBB Sesi 2017-2020 ke bukai, iya nya Sapit Ketuai Pemuda Miro Simuh enggau Fazzrudin Abdul Rahman sereta Mandal Ketuai iya nya Aidel Lariwoo, Leonard Jambu enggau Richar Silo Rugu.