Sukung ke tegap deka diberi ngagai Najib
KUCHING: Pemutus A+ ba Pengawa Bepilih Besai ke14 (PRU14) deka nentuka randau minta royalti minyak ungkup Sarawak ari Perintah Besai dikemujur.
Berindik enggau nya, Kepala Menteri Datuk Patinggi Abang Johari Tun Openg ngelalau semua parti dalam gempung Barisan Nasional (BN) Nengeri berakup lalu nentuka BN menang ba PRU14.
Iya ke mega Presiden PBB madah sukung ke tegap deka diberi ngagai Menteri Besai Datuk Seri Najib Tun Razak.
“Kitai dekaka iya (Najib) mengkang nyadi menteri besai. Enti kitai (PBB) besemaya, kitai deka nentuka semaya nya nyadi nyata.
“Lalu aku pechaya parti bukai dalam gempung BN Nengeri bela ngembuan runding ke sama ketegal tu mih kualiti politik di Sarawak,” ku iya.
Abang Johari mansutka jaku nya ba jaku pengelalu rambau Gempuru Besai PBB ke-14 ke diatur di Palan Aum Borneo Kuching ditu, kemari.
Gempuru nya dipenyadi Najib sereta bela digulu Presiden Parti Rakyat Sarawak Tan Sri James Masing, Presiden Parti Se’Ati Rakyat Sarawak (SUPP) Datuk Dr Sim Kui Huan enggau Sekretari Besai Pari Progresif Demokratik Datuk Anthony Nogeh.
Ngenang kaul ke sama, Abang Johari pecahaya BN Sarawak ulih nyapai pemutus A+ ba PRUI14.
“Kitai begempung ngenegap parti enggau BN, kitai ngeringka Sarawak, Enti Sarawak tegap, Najib pan senang.
“Enti senang, anak ke manah ke bulih A+ minta duit udah tentu apai deka meri. Nibuh mayuh, hal minyak chukup mih,” ku Abang Johari.
Ba gempuru nya mega, Abang Johari minta parti ke bisi napi penyarut mutarka pekara nya enggau lengkas.
Ku iya, enti udah nyerara diri ari parti, arapka ulih pulai baru ngagai parti asal.
“Bisi siti parti ke udah pambar, pulai mih berakup baru, anang ngingat pekara ke udah.
“Siti agi parti nya, alangalang ngena baju kuning, kena mih baju kuning aja,” ku iya.
Aku udah meri semaya sentang pekara ke bekaul enggau MA63. Enti kitai sengaja tauka enda sengaja bisi ngambi kuasa rayat enggau hak orang Sarawak, aku sanggup mulaika kuasa nya ngagai Sarawak. Datuk Seri Najib Tun Razak Menteri Besai Malaysia
Menteri Besai Datuk Seri Najib Tun Razak madah komiti nya deka berandau enggau Komiti Renggat Tinggi (Sarawak) ti diuluka tiga sapit kepala menteri.
“Aku udah meri semaya sentang pekara ke bekaul enggau MA63. Enti kitai sengaja tauka enda sengaja bisi ngambi kuasa rayat enggau hak orang Sarawak, aku sanggup mulaika kuasa nya ngagai Sarawak.
“Kitai enda tau ngambi hak orang bukai. Kitai sebuah ruang bilik lalu ke pemadu berat kitai mengkang dalam Barisan Nasional (BN) enggau Malaysia,” ku iya.
Najib mansutka jaku nya maya bejadi Gempuru Besai Parti Pesaka Bumiputera Bersatu ( PBB) Ke- 14 di Palan Aum Borneo Kuching (BCCK) ditu, kemari.
Ku Najib nambah, kededua komiti ti ngarika Perintah Besai enggau Perintah Nengeri deka berandau lalu ngiga chara mutarka pinta Sarawak nya.
Komiti Renggat Tinggi ( Sarawak) diarika Tan Sri James Masing, Datuk Amar Douglas Uggah enggau Datuk Amar Awang Tengah Ali Hassan ke alai ketetiga bela ngulu pengawa bejadi Gempuru Besai PBB ke 14 kemari.
“Abang Johari, anang irau Perintah Besai mega deka numbuhka Komiti Renggat Tinggi ngambi ulih berandau enggau ketetiga sapit kepala menteri.
“Kitai berandau manah, ngiga chara mutar ke alai ba kabinet pan mayuh orang ( menteri) ari Sarawak,’ ku iya.
Dulu agi ari nya Kepala Menteri ke mega Presiden PBB Datuk Patinggi Abang Johari Tun Openg ba jaku pengelalau madah fasa I randau sentang atur mulaika kuasa ngagai Sarawak udah tembu.
Ku iya, randau nangkanka tu iya nya Fasa II deka bejuraika pekara ke bekaul enggau undang-undang.
“Aku pechaya randau tu pan ulih dikemujur ari sukut undang-undang.
“Enti tu mujur, rayat Sarawak deka senang lalu pia mega menua Malaysia,” ku Abang Johari.
Bela datai ngerami raban 5,000 iku ari 82 pampang PBB iya nya Chairman Tetap PBB Datuk Amar Mohd Asfia Awang Nassar enggau Sekretari Besai Dato Sri Dr Stephen Rundi.