Bah di Tinjar majak surut

MIRI: Bah udah surut nyauka di semua endur kelebih agi di ulu Tinjar kemari, tang peranak menua nya agi ditangkan ngambika bejejaga enggaika bisi penyadi ujan bangat kandang beberapa hari ti deka datai.

Kunsilor Opis Pelilih Baram, Kunsilor Jarau Braim lebuh dikerandau kemari madahka rumah panjai iya di Long Sobeng, Tinjar, antara rumah panjai ke pemadu balat ampuh bah dalam minggu nyin tadi madahka tikas peninggi ai udah bisi nurun kemari.

“Gaya hari manah ngujungka tikas ai bisi kurang. Peranak dia berasai lantang meda pekara tu,” ku iya lebuhka dikerandau kemari.

Di Long Jegan, siku peranak benama Priscilla Lawai, 42 taun, lebuh dikerandau kemari mega madahka tikas ai udah surut kenyau ari pagi kemari.

“Kena Hari Lima, kami ngumbai tikas ai deka majak niki laban gaya hari ti mambam. Kami berasai irau endar laban ai semina dua kaki aja ari baruh rumah kami,” ku iya.

Ku Priscilla, gaya hari ke panas kemari ngasuh bala komuniti dia berasai lantang ati.

Berebak engggau nya, seraban 14 iku pemesai ari Raban Nyaga Pengelikun Mensia Mayuh Malaysia (APM) enggau empat iku pemesai ari Opis Pengintu Pengelantang Mensia Mayuh (JKM) udah ngagai Long Jegan enggau Long Tisam (bela di Tinjar) kena Hari Lima tu tadi nganjung bantu pemakai penusah ngenyit ngagai sida ti tasah ampuh bah.

Pemesai APM Miri, Capt (PA) Mohd Hazle Shah Abdul Hamid madahka semua 360 tungkus pemakai enggau 10 kambut tusu tepung anak mit udah dianjung ngagai Long Jegan lalu 288 tungkus pemakai enggau 20 kambut susu tepung anak mit ngagai Long Tisam.