Tu dikena ngenegapka Jaku English ba pengajar enggau nembiak
KUCHING: Opis Menteri Pelajar, Sains enggau Pansik Teknologi ngeluarka notis minta semua sekula di nengeri tu ngena Jaku English maya pengawa gempuru sekula.
Menteri iya, Dato Sri Michael Manyin Jawong madah, tuju iya dikena ngenegapka pengawa bekenaka Jaku English ngagai bala pengajar enggau nembiak.
“Kitai udah ngeluarka gerah ngagai pengajar enggau prinsipal ngambi ngemeranka pengawa bekenaka Jaku English maya begempuru di sekula sida empu.
“Kitai ngarapka nengah pengawa ke bansa tu, kitai ulih mutarka penanggul bekenaka Jaku English ti agi dikumbai lemi kelebih agi ngagai bala nembiak,” ku iya.
Iya mansutka jaku nya lebuh dirandau pengarang
Kitai ngarapka nengah pengawa ke bansa tu, kitai ulih mutarka penanggul bekenaka Jaku English ti agi dikumbai lemi kelebih agi ngagai bala nembiak. Dato Sri Michael Manyin Jawong Menteri Pelajar, Sains enggau Pansik Teknologi
berita rambau aum pengarang berita bekaul enggau pengawa nyirika iya nyadi Mandal Presiden Kanan Parti Pesaka Bumiputera Bersatu (PBB) baru rambau Gempuru Besai parti nya di Kuching, kemari.
Sebedau tu, ku Manyin, udah bisi beberapa sekula ngena Jaku English ba pengawa nyengkaum gempuru sekula.
“Tu nyadi siti pekara ti manah lalu dikearap semua sekula di nengeri tu deka bela bejalaika iya,” ku iya.
Berebak enggau nya, ku Manyin, opis menteri iya taun tu, merambu deka ngelatih bala pengajar nguasa subjek Jaku English, Matematik enggau Sains.
“Taja pia, kitai agi apin bisi pengajar Jaku English ti chukup. Nya kebuah dikena mutarka penanggul tu, opis menteri aku deka ngatur seminar enggau kus ungkup bala pengajar ngambi matih diri landik dalam Jaku English,” ku iya.
Seminar nya ku iya, deka diatur pengelama tiga hari lalu deka diatur raban landik ba jaku, orang landik motivasi enggau piak bepengelandik.
Nitih ku iya, pengelandik ba jaku nya ulih dikena nyapai juluk Kepala Menteri, Datuk Patinggi Abang Johari Tun Abang Openg mansang ngagai digital ekonomi.