PEDAS Sri Aman ngabas seraya nyua bantu ngagai Rh Alo, Ngemah
KUCHING: Raban Serakup Dayak Sarawak ( PEDAS) Sri Aman betuaika Jackson Bara, sereta disempulang Penyanding Penemu Insol Harry sereta bala bukai bisi ngabas peranak Rumah Alo, Nanga Ngemah Ili, Lemanak Lubok Antu, ke dituntung penusah angus kilah ensanus.
Jackson ke lalu nyadi chairman PEDAS Sri Aman madahka tuju pejalai sida sebuat nganjung bantu ngenyit ngagai sida ke tasah angus di rumah panjai. Antara bantu ti bisi dianjung baka gari udah dikena, barang pemakai sereta bantu mata duit.
Sida Tr Alo serumah bisi 44 pintu. Penyampau tubuh sida ke nguan rumah enggau diau nyembuah urung 216 iku.
Ari 44 pintu nya, bisi 31 pintu rumah ke angus lengis iya nya nyengkaum 23 pintu betampung enggau lapan pintu ti ngentak nyembuah, seraya 13 pintu ke bukai ti ngentak nyembuah enda jauh ari nya selamat.
Nitih ku penerang ari Tr Alo, penusah tu nyadi dipelaba bepun ari injin api peranak rumah panjai nya. Penusah nyadi urung pukul 9 malam.
Pia mega ku iya, rumah panjai nya kala dituntung penusah ke sama dalam taun 1999 ketegal minyak petrol.
Jackson ngarika raban PEDAS selampur nengeri ngarapka bantu nya ulih ngelempungka tating penusah ke ditapi sida Tr Alo serumah sereta besampika sida liat ati nempuh penguji ke enda disadang nya.
Bisi empat buah entukar 4WD dikena nganjung bantu ngagai rumah panjai nya sereta ngundan 15 iku kaban PEDAS nyengkaum Pastor Billy.
Ungkup penemu, rumah panjai tu endang sebengkah ari palan ke suah ditapatka raban temuai ari menua luar enggau ari menua tu empu.
Rumah panjai tu palan endur sida serumah mandangka main asal ungkup bala temuai ke datai, kelimpah mayuh keresa lama sereta ngepan ti digitang sebelah ruai abis angus ketegal penusah nya.
Penusah ke nuntung sida Tr Alo serumah endang balat ngenyinu ati laban sebengkah ari produk dagang temuai ke nyungkak penatai pemisi sida diatu udah lenyau.