Tiga resolusyen dibantai Raban Nembiak PBB dikemendar magang
KUCHING: Tiga resolusyen Raban Nembiak Parti Pesaka Bumiputera Bersatu (PBB) ke dibantai nyerumba Aum Besai ensana dikemendarka magang.
Ketuai Raban Nembiak PBB ke baru, Gerald Rentap Jabu madahka tiga resolusi nya nyengkaum bekaul enggau pemansang infratsruktur, ekonomi enggau politik.
“Semua tiga resolusi ke dibantaika dalam aum kami, dikemendarka magang.
“Taja pia, asil nya deka dibai ngagai Induk parti ngambika ulih dikemendarka,” ku iya lebuh ditelefon Utusan Borneo bekaul enggau pekara nya, lemai kemari.
Dulu ari nya, dalam aum pengarang berita ke diatur ba BCCK kemari, Rentap madahka resolusi keterubah iya nya bekaul enggau politik ti deka ngenukuka Barisan Nasional lebih agi PBB ulih menang besai ba Pengawa Bepilih Besai Ke-14.
“Bekaul enggau politik, kami dekan nentuka pemenang besai BN Sarawak. Lalu kami deka begulai enggau Pergerakan Wanita sereta ngambi pulai baru hak kitai, nya pekara ti dipetataika kitai,” ku iya.
Nambahka nya dalam resolusyen politik, iya madahka sida deka ngering sereta ngenukuka Sarawak ulih ngambi pulai baru hak baka ke ditulis dalam Perlembagaan Malaysia 1963.
Resolusyen kedua ke dibantai sereta dipejuraika ba aum nya bekaul enggau pemansang infrastruktur lebih agi bekaul enggau pengawa ngemansangka sekula ti udah kelalu tuai sereta jai kelimpah ari deka ngemeratka kulaiti pelajar lebih agi di menua pesisir.
“Resolusi ketiga iya nya ekonomi. Kitai deka ngiga chara bakani deka ngangkatka ekonomi raban nembiak lebih agi bekaul enggau ekonomi digital,” ku iya.
Kelimpah ari nya dalam aum pengarang berita ke sama, Rentap madahka Ra- ban Nembiak deka neruska legasi ke udah dipejalaika Dato Sri Fadillah Yusof iya nya Mantan Ketuai Raban Nembiak sebedau tu.
“Program Armada Pemuda PBB iya nya legasi ari Dato Sri Fadillah. Program nya mai kitai semak ngagai akar umbi kelimpah ari nyendiaka peluang beserakup lebih agi ngagai Pergerakan Pemuda.
“Aku pechaya parti komponen BN ke bukai mega bisi bejalaika program ke sama dikena semak enggau rayat,” ku iya.
Sama bisi dalam aum pengarang berita nya kemari, Ketuai Orang Indu PBB ke baru Dato Sri Fatimah Abdullah.