Rh Alo, Nanga Ngemah Ili nerima bantu RM270,000 ari Nyalau enggau Mussen
KUCHING: Sida ke tasah angus ba Rumah Alo, Nanga Ngemah Ili, Lemanak Lubok Antu nerima perati ari dua pengari rayat iya nya Kaban Parlimen Lubuk Antu Datuk William Nyalau Badak enggau Menteri Muda Industri enggau Beranakka Puku Malcom Mussen Lamoh.
Maya ngabas sida ke tasah angus, Nyalau enggau Mussen bela ngungkupka agih belanja penyampau RM35,000 ngagai semua sida ke tasah angus ari 31 pintu ruang bilik.
Dikena nambahka nya, Nyalau mega deka nambahka baru agih RM200,000 dikena sida meli ramu dikena ngentak rumah panjai ke baru lalu penyampau semua agih belanja ke diberi iya nya RM270,000.
“Kelimpah nya, aku enggau Mussen mega nyuaka bantu lengkas barang pemakai enggau barang guna ninting hari ungkup urung 151 iku sida ke tasah angus nya,” ku Nyalau maya dirandau Utusan Borneo.
Nerang silik, Nyalau ngelalau mensia mayuh lebih agi peranak rumah panjai patut bejimat-jimat enggau sebarang perengka ke ulih nganguska rumah.
“Amat penusah nya enda ulih disadang tang kitai patut seruran bejejaga enggau perengka ke ulih nganguska rumah lebih agi perengka karan laban karam ba ai engka kitai agi bisi tinggal reta tang enti karam ba darat sigi lengis semua utai,” ku iya.
Nya kebuah, Nyalau minta semua sida ke tasah angus ba Rumah Alo besabar nempuh penguji laban nyangka bisi kebuah penusah nya nyadi lalu enda ibuh nyalahka pangan diri.
“Iya ke beguna amat perintah Barisan Nasional sigi enda ngelarika diri ari sida tang semua sida deka dibantu enggau naka ulih,” ku tandu iya.
Rumah Alo dituntung penusah angus urung pukul 9 malam kena 8 Feb tu tadi dipelaba bepun ari injin api lalu sebedau tu rumah panjai tu mega udah kala angus keterubah ba taun 1990.