Empat mandal baru presiden PBB deka nyaup Kepala Menteri nyapai agenda Ekonomi Digital
KUCHING: Pemujur empat iku mandal presiden Parti Pesaka Bumiputera Bersatu (PBB) ungkup Bumiputera deka besaup nyadi rintai pemesai ke ulih mantu Kepala Menteri Datuk Patinggi Amar Abang Johari Tun Openg ti mega Presiden parti ngemujurka agenda Ekonomi Digital.
Pekara nya dipadahka Menteri Muda Elektrik Menua Pesisir Dr. Abdul Rahman Junaidi ke nyadi naib presiden parti sesi 2017-2020 pengudah menang pengawa bepilih Kaunsil Tetinggi Parti PBB maya baum besai PBB Ke14 ba BCCK, ensana.
“Pemujur ke dijapai kami empat tu penyulut begulai enggau bakaih ke bukai, kami ke bepilih ukai deka nentuka sapa ke menang tauka alah.
“Tang kebendar kami begulai deka nyadi sebaris pemesai ke ulih mantu YAB Kepala Menteri ngamat sereta ngemujurka agenda Ekonomi Digital jemah ila.
“Enda ngira sapa ke menang ba penuduk tu ke pemadu beguna ulih besaup nyadi siti dalam PBB,” ku Dr. Abdul Rahman dikerandau pengudah pemutus dibantaika.
Nambahka nya Menteri Dagang Temuai, Seni, Main Asal, Nembiak sereta Lumba enggau Main Datuk Abdul Karim Rahman Hamzah beterima kasih ngagai sukung delegit ke udah muai undi.
Iya madahka pengawa bepilih nya dalam runag bilik sereta nadai bekimpin laban semua bakih dalam kabinet sereta bisi pengelebih enggau pengurang.
“Tu keterubah iya aku bepilih ungkup naib presiden lalu aku ulih nyadi seiku ari orang ke megai penuduk tu.
“Lalu baka ke ngelamatu aku deka bejalaika pengawa nyadi menteri tambah mega tu siti ari perais dalam pejalai politik aku.
“Berengkah ari baruh dulu enda ibuh berumban,” ku iya lebuh dikerandau pengarang berita.
Menteri Muda Jalai tebing Pantai Datuk Julaihi Narawi lebuh dikerandau mega beterima kasih ngagai bakih dalam parti ke udah meri sukung enggau kerejasama nyentuk iya ulih ngetanka penuduk nya.
“Aku deka terus begulai enggau semua memperjuangkan enda ngira nama ti diperjuangka dalam parti PBB ungkup rayat Sarawak lebuh agi ba pengawa kitai ke deka ngemenuhka pengarap rayat,” ku Julaihi.
Kelimpah ari nya Menteri Muda Pelajar enggau Pemansik Teknologi Dr. Annuar Rapaee bepenemu pemutus bepilih dalam parti nya nadai ngayanka bida ke jauh ba penyampau undi.
“Nyadi ngayanka selubang penemu ari semua perwakilan ti deka semua empat chalun tu ngisi penuduk naib presiden,” ku iya lebuh dikerandau pengudah Chairman Tetap PBB Datuk Amar Mohd Asfia Awang Nassar, ensana.