Bas elekterik nengah SBST kelai insiatif projek pemansang di Sarawak
KUCHING: Mandal Ketuai ( Pergerakan) Orang Indu Naib Ketuai Parti Pesaka Bersatu Sarawak (PBB), Dato’ Sri Nancy Shukri madah bas elekterik ti deka dikena di Kuching baka ke udah dipadah Kepala Menteri, Datuk Patinggi Abang Johari Tun Openg ku iya, diatu agi benung dipejuraika, ngambika nya ulih digaga nengah projek pemungkal ‘Skim Transformasi Bas Henti-Henti’ (SBST).
Nancy ti mega nyadi Menteri di Opis Menteri Besai nimbal jaku Menteri Besai ti mega nyadi Presiden Barisan Nasional (BN), Datuk Seri Najib Tun Razak dalam jaku iya, maya bejadika Gempuru Besai Parti Pesaka Bumiputera Bersatu (PBB) Sarawak Ke-14 di Palan Konvensyen Borneo Kuching (BCCK) kemari ke madahka komitmen deka ngemutarka peminta Sarawak ngaga mayuh agi projek pemansang di nengeri tu.
Nancy nandu baru madahka, kemari iya bisi ngelaluka temuai iya nya chairman Perbadanan Pembangunan Ekonomi Sarawak (SEDC) Tan Sri Datuk Amar Abdul Aziz Husain, Sekretari Mendam Opis Menteri Pemansang Infrastruktur enggau Pengangkut (MIDT), Datu Safri Zainuddin enggau Dr Abdullah Zaidel ari Opis Kepala Menteri sereta Dato Henry Lau ke ngarika Konsortium BBK Sdn Bhd.
Ku iya, danji atur servis projek SBST ti di sain ba bulan November taun siti nyin tadi enda tau enda di ubah ngambika Perintah Besai ulih nyendiaka perengka guna ke ulih nyukung pengawa ngena perengka guna kuasa elekterik ba semua 90 buah bas ke deka bejalai di sitak mengeri enggau menua pesisir, genturung pendiau ke mengeri di serata Kuching.
“Danji ke udah disain entara Perintah Besai enggau operator penyambung, iya nya Konsortium Bas Bandaraya Kuching (KBBK) Sdn Bhd, di bulan November tu tadi, enda tau enda di ubah laban Sarawak begunaka penyampau ungkup ke baru kena ngepunka operasi kesemua 90 myBas elektrik, ke nyengkaum pemansang infrastuktur ke ulih nyukung pengawa ngena myBas elektrik, nyengkaum ngaga stesen palan alai ngecas bas elektrik,” ku iya.
Nitihka danji asal, Perintah Besai ngungkupka urung RM50 juta setahun kena nyendiaka servis bas ‘berhenti-henti’ di 27 bengkah endur ke mungkur lebih 10 juta km setaun.
Ku iya, ungkup Ke baru enda tau enda dipinta laban iya bisi bekait enggau ubah ba spesifikasyen pemesai bas ke udah ditetapka, laban beratika bisi jalai ke sempit begunaka bas ke mit agi.
Berindik ari pekara nya, Nancy minta Perintah Nengeri Sarawak nganjung surat rasmi, ngambika iya ulih nganjung surat nya ngagai Perintah Besai.
Ku iya, enti semua pekara nya bejalai enggau mujur, Sarawak deka nyadi menua keterubah ngena myBas elekterik ti dipelabaka deka dimunka bulan Januari taun baru tu ila.