Bup pengawa berubat, Sugi Sakit bansa Iban di Saribas udah dijual diatu

KUCHING: Bup pasal pengawa berubat, bejudul A Borneo Healing Romance: Ritual Storytelling and the Sugi Sakit, A Saribas Iban Rite of Healing diatu udah bisi dijual ba Tun Jugah Foundation berega RM120 siti.

Bup tu udah dipun dalam taun 1977 lebuh pengarang iya, ngereja pengawa di Saribas, mega pengawa berubat chara lama, Sugi Sakit. Pengawa tu meruan dikeingatka iya lalu dalam taun 2003, iya, bini iya, Louise, enggau bansa Iban ti bekerejasama enggau iya, Jantan Umbat, ngerikod pengawa lama tu, disada sereta dikereja niang Manang Renang anak Jabing di rumah panjai iya, Rumah Tarum, dalam Pelilih Mit Debak. Lebuh nya, Renang nyadi manang ke penudi ti agi ulih ngereja pengawa Sugi Sakit.

Rikod bup ke diatu dalam jaku Iban lalu teks enggau salin semua rurun pengawa lama nya, sereta mega ditambah jaku intensif Renang, nitih ku penerang berita ari The Tun Jugah Foundation dikeluar ensanus.

Penyelai kediri empu Sugi Sakit iya nya dipegulai enggau ensera tuai jerita belelang enggau nanggam pengerindu mantaika Bujang Sugi bujang berani Iban, Keling mali diri. Teks jaku enggau salin jerita tuai bisi ba dua pertiga bup nya.

Tu mai kelala ngagai pengawa Renang, jerita idup iya nyadi manang, ditangkanka lambar ti nyeritaka peragam bansa Iban sentang penyakit sereta pengelantang, berubat ngena chara lama, sereta pengawa nyadi manang ti nyuman, puchau ke dikena beliau, penerang pasal Sugi Sakit nya empu, kelai enggau penetap rama iya empu, lalu baka ni rurun iya nyadi pengawa ti nyumanka sakit.

Berindik ari Epik Sugi nya nerangka tampung enggau bab ti ngayanka simpul rurun pengawa lama nya.

Bab ke penudi enggau pengawa nanggam pengerindu enggau penyiru, ukai semina dalam Sugi Sakit aja, tang mega raban bansa Iban tebal agi, lalu jalai dalam jerita pengerindu enggau belelang ngasuh iya nyadi kereban ti nyuman.

Batang tuju bup tu dikena nangkap, pengidup nyata, pengawa lama, taja badu agi dikereja, nyentuk ke apin lama ke udah nyadi sebagi ari pekara besai nyumanka Iban Saribas.

Pengawa tu dipejalai ari baruh kemata Tun Jugah Foundation lalu set rekoding bunyi tembu digaga maya pansik ti ditaruh ba arkib di Kuching.

Pengarang bup tu nerima phD iya dalam antropologi sosial ari Universiti Harvard dalam taun 1971. Entara sekeda utai tulis ke beguna amat dikeluarka iya nyengkaum The Bajau Laut: Adaptation, History, and Fate in a Maritime Fishing Society of Southeastern Sabah (1997, Oxford UP) enggau Seeds of Play, Words of Power: An ethnographic study of Iban shamanic chants ( 2001, Tun Jugah Foundation & BRC).

Iya diatu nyadi editor ba Borneo Research Bulletin, sebuah jurnal ninting taun Borneo Research Council, pengawa udah dipangku iya kenyau ari taun 1995.

Edisyen Malaysia bup tu dikeluarka Tun Jugah Foundation lalu iya bisi dijual ba Malaysia ari The Tun Jugah Foundation di P.O. Box 734, 93714 Kuching, Sarawak, Malaysia lalu tau mega ditanya nengah lumur 082-239672; Facsimile: 082412185; janet@ tunjugahfoundation.org.my. robert@ tunjugahfoundation.org.my.