‘Ops Khas’: Tujuh ditan ketegal posiitif dadah
KOTA SAMARAHAN: ‘ Ops Khas’ ti dipejalaika Opis Perengka Pengangkut enggau Jalai (JPJ) begulai enggau ejensi bukai baka Ejensi Anti-Dadah Kebangsaan (AADK), Opis Rampa Menua (JAS), Opis Nagang Makai Suap ( SPRM) enggau Polis Diraja Malaysia (PDRM)di Jalai Kota Samarahan kemari,udah mujur nangkap sida ke ditemu gian dadah maya nepan mutosikal nyengkaum penyalah bukai.
Ari penyampau ke diperesa berengkah ari pukul 9 pagi kemari ngagai pukul 11 pagi, tujuh ari sida ke ngena mutosikal ditangkap, nyengkaum mutosikal sida lalu ditanka laban ditemu gian dadah.
Direktor Opis JPJ, Mohd Syafiq Anas Abdullah madah, sida ke ngena mutosikal maya operasyen nya dipejalaika, ditan lalu diperesa, lalu ari pemayuh nya 7 iku ditemu positif dadah.
“Sida tu diperesa ai kemi lebuh ke ditan, sereta ditemu positif dadah (maya operasyen nya).
“Dalam kandang sejam ‘ops’ tu udah dipejalaika (pagi kemari), 7 ditemu positif dadah ari 100 iku ke diperesa, lalu sida tu mega deka dianjung ngagai palan berubat pengerai AADK,” ku Mohd Syafiq madah ba aum pengarang berita, maya operasyen nya ditu, kemari.
Iya nandu baru, madahka peresa ai kemi mega dipejalaika ba urung 145 deriba bas berengkah ari 9 nyentuk 13 Februari, kelimpah ari meresa dokumen deriba, bup log, deriba bas lumur dua nengah kerejasama enggau AADK di terminal ekpres bas.
“Maya deriba bas sereta deriba penganti diperesa ai kemi, naka ke diatu, semua asil nya negative,” ku iya.
Ku iya baru, Ops Khas ke dipejalai beserimbai enggau hari besai Taun Baru China (TBC)tebal agi nagit mutosikal.
Kenyau enam hari operasyen tu udah dipejalaika ti berengkah ari 9 Februari tu tadi, sida udah meresa 2,448 buah kerita enggau semua perengka pengangkut di jalai alun di nengeri tu, lalu 207 iti saman udah dikeluarka ngagai sida ke ngaga penyalah.
Taja pia,naka ke diatu nadai sebarang kes positif dadah tauka pil bisi ditemu ba terminal bas enggau depo. Tu mandangka bisi pemansang ke manah, ngangkatka ‘Perception of Being Caught (POBC).
Berebak enggau nya, iya mega madah taun tu JPJ Malaysia udah milih rambaijaku ‘Mengharmonikan Penguatkuasa’, ke mai reti JPJ ukai semina ngeluarka saman aja tang lalu beratika pemujur trafik,ku iya.
Ku iya baru, maya operasyen Taun Baru China tu mega, JPJ enggau ejensi bukai mega beratika trafik ba semanjai projek Pan Borneo Highway(PBH),kelebih agi baka ke diatu jalai ke benung digaga nya jalai enda berapa manah.
Sama bisi enggau ba operasyen nya kemari, Direktor Opis Ejensi Anti-Dadah Kebangsaan ( AADK), Wan Madihi Wan Salleh, Ketuai Pemesai Neritka Adat Trafik ari Indu Opis Polis Kota Samarahan, Insp. Mohd. Hairul Nizam Ramli, pengari ari Opis Rampa Menua (JAS)enggau Opis Makai Suap (SPRM).