Kurang penemu ba adat ukai nyadi penanggul dichiri nya ketuai, ku Rickie Andrewson
KUCHING: Siku penanyi Iban ke chukup tebilang, Rickie Andrewson, 33, ke udah dichiri nyadi Tuai Rumah (TR) Skim Sekuau di Selangau, madah kurang penemu ba adat enggau undang-undang rumah panjai ukai patut nyadika penanggul nyiri orang biak nyadi tuai rumah.
Laban ku iya, pasal adat nya ulih dipelajar sereta ditampung ari orang tuai tauka orang ke udah dulu nyadi ketuai kelimpah ari kelimpah ari ngulu kus ti bisi diatur perintah.
“Pemar ke ditapi nyadi tuai rumah endang sigi mayuh kelebih agi baka aku ke agi biak sereta baru mangku pengawa nyadi ketuai. Aku endang agi begunaka sukung ari orang lama nyadi ketuai sereta bepeneleba pasal adat enggau undang-undang rumah panjai.
“Bisi mega sekeda orang enda tentu setujuka orang biak umur dichiri nyadi ketuai tauka tuai rumah laban ti kurang penemu ba adat.
“Ba penemu aku nya anggap ti salah, laban enti udah dichiri nyadi ketuai deka bisi kus pasal adat ke bisi disediaka perintah ninting taun, nya mih peluang belajarka semua nya,” ku iya madah ngagai Utusan Borneo, kemari.
Rickie dipilih sereta disukung peranak rumah panjai nya nyadi tuai rumah kena 1 Januari 2017 nganti apai iya, Andrewson Ngalai ke dichiri nyadi Penghulu. Tang iya sah nyadi tuai rumah pengudah nerima surat chiri tauka setipikit ari perintah nengeri kena 1 Januari 2018.
Rickie ngiring ngembing lebih 140 iku peranak rumah panjai nya ke mungkur 29 pintu.
Sebaka enggau tetiap iku orang ti nyadi ketuai, Rickie mega bisi juluk ati deka ngemansangka rayat iya enggau rumah panjai.
“Tiap iku kitai endang bisi juluk, tang juluk sesiku orang ke nyadi tuai rumah endang patut ngembuan ati besai sereta mesti bisi juluk dikena ngemajuka rumah panjai nuju pemansang ti lebih moden sereta nyamin pengelantang raban bansa enggau rumah panjai.
“Aku amat beterima kasih ngagai sukung penuh ari kami serumah empu. Aku deka mai pemansang ngagai rumah panjai ngena chara baru kelebih agi muka mata sereta runding raban nembiak enggau raban bansa,” ku iya.
Ditanya chara iya magi tanggungpengawa nyadi tuai rumah enggau nyadi artis pemerindang, Rickie madahka tetap ngawakka diri pulai ke rumah panjai sereta matau, mutar sereta mai pemansang ke patut ngagai rumah panjai.
“Lebuh bisi pengawa merindang, aku bisi sapit nulung aku ngemata enggau madahka pekara baru tauka tetiap pengawa ba rumah panjai,” ku iya lebuh ditelefon.