Nengah pengawa dagang raban bansa China kebendar nya udah nyaup ngengegapka ekonomi menua tu: Abang Johari
KUCHING: Komuniti China di nengeri Sarawak bisi pemerat dalam pengawa dagang sereta industri, kelebih agi dalam proses perintah ti benung ngenegapka ekonomi menua.
Kepala Menteri Datuk Patinggi Abang Johari Tun Openg madah ngelama tu, pengawa dagang komuniti raban bansa China seruran nyaup industri dagang di Sarawak.
“Aku pechaya bala pangan kita ari komuniti China deka majak nyukung pengawa perintah ngenegapka penuduk ekonomi enggau pemisi sida, di dalam menua tu (domestik) sereta penemu enggau kaul sida di renggat antarabansa.
“Perintah endang betatika pemerat komuniti China di menua tu, lalu sedia mendingka penanggul sida, ngambika ngangkat nambahka pengelantang ngaga pengawa dagang sida di Sarawak,” ku Abang Johari madah nengah jaku lalau iya ngagai komuniti China ke nyambut hari besai Taun Baru China di menua tu.
Iya nandu baru madahka gaya ekonomi menua tu ke majak tegap nyadi berita manah ngagai komuniti China, ke mayuh ngaga pengawa dagang sereta servis di menua tu.
“Aku ngarapka orang dagang ari komuniti China, begulai enggau komuniti bukai deka ngambi peluang dalam barang dagang di menua tu, kelebih agi dalam pengawa ngaga rumah, infrastruktur, dagang temuai sereta industri pemakai,” ku iya.
Abang Johari ti mega nyadi Menteri Wang enggau Perambu Ekonomi nandu baru madahka Sarawak sebuah menua ke bepengeraja enggau diversiti, ukai semina ba pengeraja asal, tang adat pesaka, chara pendiau sereta pengarap kitai.
“Di Sarawak, nadai sebarang penanggul ke nekul tiap komuniti di menua tu, diau dalam pengelantang pendiau chara kitai empu, baik nya ari sukut adat pesaka, sereta pengarap kitai.
“Kitai nyambut sereta ngiga penegap dalam diversiti kita, ngiga palan ke ulih alai kitai begulai enggau pangan diri, ke enda ngira bansa tauka pengarap kitai.
“Nya gaya Sarawak ke ditemu kitai baka kediatu – beserakup sereta ngembuan kaul ke rat, ke nyadi chunto ngagai nengeri bukai di Malaysia,” ku iya.
Iya mega ngelalau bansa bukai, ngambika ngena awak pengerami Taun Baru China tu ngabang ngagai komuniti China, ngambika ulih neritka agi kaul dalam menua tu ke datai ari mayuh macham jalai pengarap, bansa sereta adat pesaka.
“Awakka Sarawak majak nyadi chunto sentang penyerakup pupu raban bansa sereta jalai pengarap ke serata menua Malaysia,” ku iya.
Abang Johari ti mega nyadi Menteri Pemansang Mengeri enggau Rampa Menua madahka, kitai rayat Sarawak berasai temegah ati laban nengeri tu ngembuan pemereti ati sereta bebasaka pangan diri, lalu ulih diau dalam komuniti pupu bansa sereta negika penyerakup.
“Kita seruran ninga berita tauka meda mayuh penusah tauka penanggul ke nyadi ba nengeri bukai di menua tu, ke semina deka ngeruga kitai, bebagi, ke betungkatka bansa sereta pengarap.
“Kitai beterima kasih ngagai Petara, laban utai bansa tu enda nyadi di Sarawak, lalu seruran besampika rayat nengeri tu deka majak diau beserakup, nyaup sereta bekunsi enggau pangan diri,” ku iya.
Kelimpah ari nya, iya madah Sarawak enda tau enda tegap dalam ekonomi lalu ulih ngiga pemisi kediri empu, kena ngemansangka menua tu nuju taun 2030.
“Taja pan, kitai bisi ungkup ninting taun ke diberi Perintah Besai, tang beratika pemesai menua Sarawak, ungkup ke diberi enda chukup kena ngaga pemansang ke menua tu.
“Ketegal tu, kitai nusun pengawa kitai dalam mayuh macham sukut ekonomi, ngambika ulih ngubah Sarawak nyadi sebuah menua ke betatika ekonomi digital dalam kandang dua puluh taun tu ila,” ku iya.
Iya nandu baru madahka, taja pan sukung Pemansut Kasar Asil Dalam Menua (KDNK) ba renggat ekonomi nasional, ketiga pengabis besai laban pemisi minyak enggau gis, tang pukul rata pemisi ruang bilik semina nyapai tikas urung RM4,000, ke agi kurang endar.
PemansangKDNKSarawak baka kediatu ku iya, enti nitih pukul rata, semina 4 peratus ninting taun, enda chukup kena kitai angkat nyadi menua ke mansang sereta ngembuan ekonomi kitai nyapai tikas lebih ari nya.
“Pakar ekonomi madahka, Sarawak begunaka pengabis kurang pukul rata 6 peratus ninting taun, enti kitai ulih nyapai tagit nya. Tu ke nyadi pemerat Perintah, kelimpah ari nyengkaum pemerat sida ke diau di menua pesisir, ke deka meda pemisi infrastruktur jalai, sekula sereta perengka guna bukai, kena ngemanahka agi kualiti pendiau mensia mayuh di menua pesisir,” ku iya.
Pemisi Bank Pemansang Sarawak (DBOS), kompeni minyak enggau gis kediri empu (PETROS), pungkal program numbuhka grid ai menua ke dibayar ulih Sarawak kediri empu, kena melanja renggat pemungkal projek tu ari Batang Ai ke Tanjung Manis, ai ari tekad ai hidro menua ( ke ulih dikena ngemansangka ai beresi ngagai mensia mayuh di menua pesisir),sereta pengawa Ekonomi Digital,dalam kandang 5 ngagai 10 taun tu ila, deka muka sereta ngangkatka ekonomi menua tu.
“Ke semua pemansang tu, Sarawak ngarapka ulih nyapai pemansang KDNK 6 peratus ninting taun, lebuh kitai bejalai nuju 2030,” ku iya.
Aku pechaya bala pangan kita ari komuniti China deka majak nyukung pengawa perintah ngenegapka penuduk ekonomi enggau pemisi sida, di dalam menua tu (domestik) sereta penemu enggau kaul sida di renggat antarabansa. Datuk Patinggi Abang Johari Tun Openg Kepala Menteri