Staf perintah meseti bejalaika pengawa enggau lurus, komited

MIRI: Bala staf gawa perintah ti gawa tauka bekereja dalam sektor bejalaika projek perintah suah agi napi penyalah makai suap nyema nadai integriti.

Pekara tu dibantaika Menteri Muda di Opis Kepala Menteri ( Integriti dan Ombudsman), Datuk Talib Zulpilip ti sedarka bisi pengawa ti enda manah dalam projek infrastruktur perintah.

“Enti projek perintah enda nitihka standard dalam kunterik, bala ketuai raban bansa patut berani ngeripot ngagai ejensi bekaul tauka terus ngelawa aku,” ku iya rambau Pengawa Ngangkat Sumpah Nadai Makai Suap Renggat Bagi Menua enggau Pelilih Miri, ditu kemari.

Pia mega ku Talib, sebedau tu bisi projek jalai ti digaga di rumah panjai enda nitihka spefikasyen enggau standard.

“Anang nangi ngeripot penyalah makai suap tauka salah guna kuasa laban kitai dekaka semua projek rayat tu dipejalai enggau betul sereta lurus,” ku iya nyemetak.

Ku iya, enti bisi staf perintah nadai ngembuan integriti, projek rayat ti beungkus bejuta ringgit pan deka tejanggal ketegal limpang ari pengawa asal enggau salah guna kuasa.

“Kitai rayat ti nyadi mata enggau pending perintah, nyema nemu pekara ti enda betul pasal projek perintah, kitai patut berani ngelara.

“Anang kiruhka bisi sida menijar projek tauka injinir,” ku iya.

Kaban Kunsil Nengeri (ADUN) Jepak madahka bala staf perintah dipinta bejalaika pengawa enggau integriti sereta bisi komitmen.

Ku Talip, niang Pehin Sri Adenan Satem nyadi orang ti terit ba pekara makai suap lalu bejalaika pengawa ngangkat sumpah nadai ngaul pengawa makai suap, dientudika bala kabinet enggau staf perintah.

Atur pengawa tu ditampung Kepala Menteri Datuk Patinggi Abang Johari Tun Abang Openg ke mega ngemeratka pekara integriti dalam rintai kabinet enggau bala staf perintah di nengeri tu.

Ba lansa bukai, Residen Miri Sherrina Husaini ngetuai urung 200 iku staf perintah ari mayuh bengkah opis enggau ejensi perintah ngangkat sumpah nadai makai suap rambau atur pengawa nya.

Pengawa tu dikemata empu Penulung Direktor Komiti Nagang Pengawa Makai Suap Malaysia (SPRM) Miri, Othman Anyan.

“IBR ngangkat basa tanggungpengawa sereta akauntabiliti staf ngambi ngenyauh sereta nyeliahka sebarang pengawa makai suap, limpang pengawa enggau salah guna kuasa sepanjai bejalaika pangku pengawa,” ku iya.