15 iku kaban KDJA udah ngatur penemuai ngagai BERNAMA
KUALA LUMPUR: 15 iku pengarang berita ari Gerempung Pengarang Berita Pelilih Menua Kuching (KDJA) ti betuaika chairman Jacqueline David bisi ngaga penemuai ngagai Agensi Berita Nasional Malaysia ( BERNAMA) di Menara IMC, Jalai Sultan Ismail, Kuala Lumpur.
BERNAMA iya nya sebuah ejensi berita, entara ke pengabis lama beoperasyen di menua tu, ti udah di buka dalam taun 1968 ari baruh Perintah Menua Malaysia, iya nya Opis Menteri Komunikesyen enggau Multimedia Malaysia.
Penatai pengarang berita ari Kuching ngagai opis nya disambut pemesai BERNAMA nyengkaum chairman ejensi berita tu, Datuk Seri Azman Ujang.
Ba atur pengawa berandau sereta bekelala enggau pengarang berita ari Kuching, Azman meri penemu iya pasal pengawa pengarang berita baka kediatu dibanding enggau ‘populariti’ berita portal ke mayuh dikena orang kemaya hari tu, lalu bakani industri media baka kediatu, napi penanggul berita portal ke majak popular, ngujungka mensia mayuh jarang macha berita chelak ba surat berita.
Pengarang berita ari Kuching mega dibai ngelawa ngagai mayuh bengkah endur unit berita sereta TV ke dikembuan BERNAMA.
Ba kenang ke bukai raban KDJA tu mega bisi ngatur penemuai meri basa ngagai Sapit Menteri Besai, Datuk Seri Ahmad Zahid Hamidi.
Sama bisi ngulu atur pengawa nya, Sapit Ketuai Direktor BERNAMA (Berita Ekonomi), Nor Faridah Abd Rashid.