Nya kebuah aku udah ngaga pemutus nguna chara ke bebida kena bejalaika polisi dikena ngenegapka agi ekonomi nengeri
KUCHING: Kepala Menteri Datuk Patinggi Abang Johari Tun Openg madahka nengeri tu meseti bisi penegap ba ekonomi sereta ulih mansutka mayuh agi pemisi dikena melanja pemansang iya datai ba taun 2030.
Nya kebuah ku iya, iya udah ngaga pemutuska ngambi chara gawa bebida kena bejalaika polisi dikena ngenegapka agi ekonomi nengeri, pechayaka nengeri patut berubah ari sukut ekonomi sereta kering dalam ekonomi mua.
“Lebuh aku datai ngagai opis urung setaun ke udah, aku ngaga pemutus deka ngena chara gawa bebida ukai ketegal aku deka bebida. Aku engka enda tebilang nama ba pekara tu tang aku ngaga pemutus deka bejalaika polisi ngenegapka ekonomi nengeri, laban aku pechaya kitai patut ngubah ekonomi enggau kering dalam ekonomi mua,” ku iya dalam jaku pesan Taun Baru China iya.
Antara inisiatif ti dipejalaika Abang Johari iya nya numbuhka Bank Pemansang Sarawak ( DBOS) enggau Kompeni Minyak enggau Gis Sarawak ( PETROS), ngambika ulih nyadi pemain ti aktif dalam industri minyak enggau gis begulai enggau PETRONAS dalam timpuh dua taun.
Iya nyemetak madah ari pengawa numbuhka DBOS, nengeri bisi model belanja baru dikena melanja projek strategik dikena ngenyampatka pemansang di sekeda kandang menua enggau nambahka belanja domestik dikena mansutka mayuh agi aktiviti ekonomi ngambika pengunaan domestik ulih ditambah.
Ku iya nambah, bisi mimit rizab nengeri ti tegap patut diperanak lalu ukai semina disimpam dalam bank di menua tu.
“Enti kitai dena beranakka puku rizab kitai enggau projek ekonomi strategik, kitai deka lenyau peluang ngena iya ngemansangka ekonomi kitai.
“Nadai sanggu agi kitai bisi agih belanja tetiap taun ari perintah besai, tang beratika pemesai Sarawak, iya suah agi enda chukup dikena melanja program baka pemansang infarstruktur enggau penyikap perengka guna pemun. Nya kebuah kitai bejalaika mayuh macham inisiatif ekonomi dikena meransang ekonomi kitai enggau berunding ngangkatka Sarawak ke dalam ekonomi digital dalam timpuh dua dekad,” ku iya madah nyemetak.
DBOS enggau beranakka puku dalam projek startegik dipelaba deka mansutka sekeda asil enggau tu deka nyediaka kitai enggau reti iya mayar baru ngagai rizab nengeri, iya ti udah diambi kitai lalu dipasuk ke dalam DBOS nyadika bayar kapital iya,” ku iya nerang silik.
Ba pekara PETROS, Abang Johari nyemetak madahka besibil enggau skeptism, iya deka ukai semina nyadi Production Sharing Contract company (PSC) aja, tang mega deka gawa begulai enggau PETRONAS lalu chakah gawaka bagi diri dalam aktiviti hiliran ba industri minyak enggau gis di nengeri tu.
Kelimpah ari pengawa numbuhka loji methanol di Bintulu, nengeri tu mega dipelaba deka mayuh agi beranakka puku ngaul Petros enggau pemeranak puku dalam sektor minyak hiliran, ku iya, nyemetak madah nengeri udah nyain surat terma enggau Petronas dikena meli 10 peratus saham dalam LNG Train 9 di Bintulu lalu kitai ngarap ulih nambahka saham kitai di LNG 3 ari 10 peratus ke diatu manggai 25 peratus.
Nitih ku iya, nengeri tu mega chakah ngambi bagi dalam industri minyak enggau gis ditulis dalam kuasa undang-undang kitai enggau konstitusyen.
Kepala Menteri mega madahka Gross Domestic Production ( GDP) mansutka asil ngagai ekonomi nasional iya nya ketiga pemadu besai laban ari minyak enggau gis, tang penetai pemisi ruang bilik ninting bulan kitai urung RM4,000 agi jauh baruh.
Nitih ku iya, purata pengerembai GDP diatu 4 peratus ninting taun enda cukup ngasuh kitai mansang enggau ekonomi bepenatai pemisi tinggi ila,” ku iya, seraya nambah, madahka nengeri tu begunaka purata 6 peratus per annum enti kitai deka nyapai tagit.
“Tu pemerat perintah diatu seraya enda ngelaungka peminta nyediaka peranak menua pesisir enggau jalai ti meruan agi, sekula sereta penyikap perengka guna ke bukai dikena ngangkatka tikas idup kitai di kandang menua pesisir,” ku iya.
Ku Abang Johari, perintah nengeri mega benung ngepunka program dikena numbuhka sebuah grid ai nengeri enggau RM1 biliun belanja nengeri kitai ti diatur kediri dikena bejalaika renggat keterubah ari Batang Ai ngagai Tanjong Manis, seraya nambah, nengeri bisi mayuh ai ti patut dikena memanah meri bekal ai ngagai peranak di kandang menua pesisir enggau tebing tasik.
Ku iya, renggat keterubah deka dipejalai di dalam timpuh dua taun tu tang renggat ke bukai ti mungkur serata nengeri deka begunaka timpuh panjai agi nyadi nyata.
Ku iya, bisi RM6 ngagai RM7 biliun deka dibelanja dikena nyambung grid ai serata nengeri ti ulih mansutka asil ari mekalka ai, madahka belanja mega deka bisi mangka ba meransang mayuh agi belanja ngagai ekonomi peranak menua tu.
“Kitai (perintah nengeri) dekaka tu nyadi program holistik dikena mutarka penanggul bekal ai kitai ti bisi maya ironik laban kitai bisi mayuh ai tang bisi sekeda rayat nadai nerima ai kelebih agi di kandang menua tebing tasik,” ku iya.
Kepala menteri mega andal amat enggau penegap belanja mensia mayuh enggau Inisiatif Ekonomi Digital dalam lima ngagai 10 taun ti deka datai, nengeri tu deka ulih muka ekonomi iya empu lalu ngulihka mayuh agi belanja ti patut meransang pengerembai ekonomi menua tu dikena nentuka ulih nyapai pengerembai 6 peratus ninting taun datai ba taun 2030.
Pia mega ku iya, raban bansa China, nyadi pemain besai dalam dagang enggau industri bisi pangku pengawa besai patut dikereja dalam pengawa perintah ke diatu ti ngenegapka ekonomi nengeri, lalu komuniti deka terus nyukung pengawa perintah ba pengawa ngenegapka penuduk ekonomi enggau pemansut sida, pengaruh domestik enggau antarabansa sereta rentayan kereja.
Ba lansa ke bukai, rayat patut temegah ati Sarawak nyadi menua ke alai rayat ulih mereti sereta bebasaka pangan diri lalu ulih diau bebaik dalam penyerakup ke nyadi pekara pemadu beguna pulaika pemanah enggau pengelantang, lalu dikearap rayat deka seruran diau bebaik begulai enggau bala bukai baka bala bakih sereta deka bekunsi lalu enda ngatika diri.
Ku iya, pekara ti nyadi di bagi menua bukai semina mida enggau nyelara komuniti enggau pekara raban bansa sereta pengarap ti patut enda nyadi di nengeri tu.
“Kemeranka Sarawak terus nyadi chunto penyerakup enggau pengelatang pupu bansa enggau jalai pengarap ngagai semua di menua tu,” ku iya.
Abang Johari mega madahka niang Kepala Menteri Pehin Sri Adenan, udah bejalaika mayuh atur pengawa dikena ngelempungka tating penusah rayat.
Lebuh aku datai ngagai opis urung setaun ke udah, aku ngaga pemutus deka ngena chara gawa bebida ukai ketegal aku deka bebida. Aku engka enda tebilang nama ba pekara tu tang aku ngaga pemutus deka bejalaika polisi ngenegapka ekonomi nengeri, laban aku pechaya kitai patut ngubah ekonomi enggau kering dalam ekonomi mua. Datuk Patinggi Abang Johari Tun Openg Kepala Menteri Sarawak