Juluk Joshua ngambi peresa UPSR deka nyadi nyata pengudah diakun nyadi peranak Malaysia
KUCHING: Nengah pemisi surat pemendar peminta nyadi peranak menua, udah meri peluang ngagai Joshua Joe Jusing, 12, ngambi peresa Ujian Pencapaian Sekolah Rendah (UPSR) 2018.
Indai Joshua, Madlina,30, lebuh dikerandau madahka diri gaga ati laban peminta anak iya nyadi peranak menua Malaysia kelebih agi Sarawak udah nyadi nyata.
Sebedau tu ku Madlina, iya irau amat ati laban anak iya ke benung dalam Primari Enam enda ulih ngambi peresa perintah ketegal ukai status peranak menua tu.
Nitih ku penerang, Madlina asal ari menua Solomon jadi enggau Jusing ti asal ari Sepupok Niah, Miri. Joshua diperanakka di Solomon lalu dibai pulai ke Sarawak maya umur setaun.
“Aku chukup gaga ati sereta meri terima kasih ngagai perintah laban ke udah ngemendarka anak aku bulih status peranak menua ditu.
“Tu meri peluang ngagai iya (Joshua) ulih ngambi peresa Primari Enam. Sebedau tu dipadahka enda ulih ngambi peresa perintah nya laban ke ukai status peranak menua.
“Proses kami ti mintaka Joshua nyadi peranak menua tu kenyau ari umur iya setaun nyentuk ke umur iya udah manggai 12 taun. Baru diatu dikemendarka,” ku iya lebuh dikerandau Utusan Borneo pengudah program nyuaka surat pemendar status peranak menua kemari.
Joshua entara 42 iku orang ke nerima Surat Pemendar Minta Nyadi Peranak Menua Ari Bawah Pekara 15A ke disuaka Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah nyerumba ‘Program Wacana Bestari: Masalah Dokumen Pengenalan Diri’ di Bagi Menua Kuching, kemari.
Nitih ku Madlina,Joshua bisi menyadi ke beumur semilan taun tang menyadi iya nya nadai penanggul senentang dokumen enggau peranak menua.
“Kebuah ke bisi penanggul peminta nyadi peranak menua maya Joshua agi umur setaun laban maya nya bisi penanggul ba surat tikah. Tambah mega aku dudi setaun ari Joshua pulai kitu,” ku iya.
Kelimpah ari nya, Surat Pemendar Minta Nyadi Peranak Menua Ari Bawah Pekara 15A ke diterima sida bebansa China, nganggap nya Ang Pau besai nyerumba Taun Baru China taun tu.
Pia mega ba Kuan Chan Foo, 38, enggau Yue Lang, 34, seduai gaga ati laban empat iku anak iya udah dikemendar sereta nerima surat nya kemari.
Nitih ku Kuan, dalam timpuh lima taun ngenataika peminta sereta berapa kali enda diterima, ketegal penerang ti enda chukup.
Ku iya, berindik ari ke nadai status peranak menua, anak iya enda diterima ba sekula perintah enggau peribit di nengeri tu, tang disekulaka iya nengah bantu gerempung ukai dikuasa perintah (NGO).
Empat anak Kuan ke nerima surat nya kemari iya nya Kuan Sze Nyun beumur 13 taun, Kuan Nin Xuan (12), Kuan Sze Jing (8) enggau Kuan Nin Le beumur 3 taun.
Kuan madahka udah tu iya deka minta anak ke-5 ti baru beumur dua bulan status peranak menua.
“Sehari tu aku berasai gaga ati, pekara ke pemadu beguna udah tu aku ulih nganjung sida empat belajar ba sekula perintah,” ku iya ke asal ari Kuching sereta gawa masang wayar karan.