Komuniti China mujur mai pemansang ke S’wak
KUCHING: Komuniti China sebagi ari komuniti menua tu, ke sama enggau ngangkatka menua tu, nengah pemagas sereta pengawa dagang ke dikereja sida dikena nyungkak ekonomi menua tu.
Tuai Megai Menua (TYT) Tun Pehin Sri Abdul Taib Mahmud madah ari sukut ekonomi, iring embing polisi ke manah ari perintah nengeri kenyau ari merdeka kelia, mujur ngemansangka polisi ekonomi nengeri tu.
“Enti nitih sebedau merdeka kelia, Sarawak mujur nyungkak ekonomi menua tu ke meri pengelantang ngagai menua tu, tang ke berat agi rayat enda tau enda enggau ngemujur pengawa pemansang tu,” ku Taib.
Ku iya, rayat di nengeri tu udah mujur ngasaika pemendar sereta asil ari pemagas sida, lalu pemujur sesebengkah komuniti, ngaga pengawa sida iya nengah atur chara ke manah bekaul enggau pengelebih komersial ti dikemeran.
“Ambika chunto, komuniti China mujur mai pemansang ngagai Sarawak. Baka ke dipeda kitai, Sarawak ngembuan peluang pengawa sereta kaul ke terit entara pupu raban bansa,” ku iya.
Ku iya baru, nya madahka trend nuju sebuah komuniti ke mujur ti meri penguntung ukai semina ngagai kelas kom- ersial aja, tang semua renggat komuniti deka dipajakka, lebuh Sarawak nyingkang nyadi menua ke mansang sereta bepengeraja manggai taun 2030.
“Kita mujur mai mayuh orang ke bepengelandik ngambika sida iya nyadi orang ke ngasi dalam pemansang ekonomi ngambika semua rayat menua tu sama bela ulih ngasaika pemujur pemansang nya,” ku iya.
Taja pan trend nya ku iya, bedau datai ba japai ti dikedeka kitai, trend nya tegap ke ulih alai tetiap pupu bansa teulihka penguntung ba japai ke diulih ari pemansang neng ah pemisi sereta kerejasama semua pupu raban bansa.
“Chara berunding kitai ke nyau berubah mai penyerakup ba entara mensia mayuh, kerejasama ke terit entara pupu raban bansa, peluang pengawa ke mayuh dibuka ngagai bala nembiak kitai sereta aktiviti ekonomi ke dikerembaika nengah gempung palan ekonomi tradisional sereta ngemansangka pemisi ari pengawa betanam betupi ke muntang digaga ngagai mayuh agi bengkah aktiviti ekonomi bukai,” ku iya.
Penemu baka selama ku iya, mensia mayuh nemu reti enti menua nya menua ke bepemisi, aktiviti ekonomi pan majak mayuh, ke bela disereta bala mayuh ke bekunsika pemisi nya.
“Peda kita menua pesisir diatu, komuniti menua pesisir ukai semina ngeluarka asil betanam betupi sida tang sida mega ulih ngeluarka modal mensia ke pengawa pemansang.
“Menua pesisir diatu mujur ngeluarka beribu orang ke bisi pelajar, ke berengkah ngena pengelandik sida iya ngemansangka ekonomi, enda baka kelia, alai komunitim Cina mayuh agi ngereja pengawa dagang ari Bumiputera ke ngereja pengawa betanam betupi,” ku iya.
Kelimpah ari nya, iya madahka pemansang ekonomi kitai majak moden, lalu gaya pengawa ke pansut ari nya, ari pemansang gempung ekonomi kitai, deka meri penguntung ngagai semua pupu bansa sereta kaul kerejasama entara komuniti.
“Dalam kandang 50 taun tu ke udah, tu gaya trend ke deka meri penguntung ngagai semua komuniti. Trend tu deka manah dalam dalam chura ke sebaka lalu deka mai kaul ke terit agi ba entara komuniti China, Melayu, Iban, Bidayuh, Orang Ulu lalu meri penemu ngagai semua komuniti ngambika menua tu majak lantang sereta deka meri peluang ngagai bala anak sida,” ku iya.