Sarawak beguna lebih RM100 juta ngadu perengka ke udah rusak ketegal ampuh bah, ku Masing
KUCHING: Sapit Kepala Menteri Tan Sri Datuk Amar Dr James Masing pechaya Perintah Besai deka meri bantu belanja dikena ngemanah perengka guna ke udah rusak ketegal penusah ampuh bah di Sarawak bedau lama tu tadi.
Ku iya, dulu agi ari tu Perintah Besai udah meri bantu ngagai nengeri Kelantan sereta Terengganu lalu ke pemadu baru meri bantu ngagai Pulau Pinang ketegal penusah ke sama.
“Aku chukup pechaya Perintah Besai deka meri bantu belanja ketegal dulu agi ari tu sida udah meri bantu ngagai tiga nengeri di Semenanjung Malaysia ke bela napi penusah ke sama.
“Urung setengah bilion dipelanja di Semenanjung Malaysia lalu nadai kebuah kitai enda diberi bantu ke sama.
“Nambahka nya, Sarawak sigi kubu tegap Barisan Nasional(BN) ke alai Kelantan dikuasa penyakal.
“Menteri Besai Datuk Seri Najib Tun Razak udah ngereja pengawa ke manah, meri bantu enda ngira bengkah parti politik,”ku iya lebuh dikerandau kemari.
Sentang pekara nya, Masing ke mega Menteri Infrastruktur enggau Pengangkut madah pinta bantu nya udah dikenatai ngagai Sapit Menteri Besai Datuk Seri Dr Ahmad Zahid Hamidi enggau Menteri Kereja Raya Dato Sri Fadillah Yusuf.
Ku iya, surat pinta ti ngundan penerang sentang kandang endur ampuh bah enggau penyampau penegrusak deka dianjung ngagai Fadillah dalam timpuh ke semak.
Fadillah ku iya deka mantaika pinta Sarawak nya ngagai Perintah Besai
“Anggar kasar penyampau pengerusak ketegal ampuh bah di Sarawak ngelui RM100 juta.
“Ba Kapit aja tiga jematan runtuh iya nya jematan Sg Tunoh, Murum enggau Belaga lalu tu begunaka belanja ngelui RM 5 juta.
“Jalai Menjawah ke Belaga ke beungkus RM90 juta bela rusak ketegal ampuh bah tu tadi, reti nya ba Kapit aja udah begunaka RM100 juta.
Aku chukup pechaya Perintah Besai deka meri bantu belanja ketegal dulu agi ari tu sida udah meri bantu ngagai tiga nengeri di Semenanjung Malaysia ke bela napi penusah ke sama. Tan Sri Datuk Amar Dr James Masing Sapit Kepala Menteri Sarawak