Empat kelas main asal ASADIA udah berengkah dipejalaika pun bulan Februari
KUCHING: Empat kelas belajarka main asal ke diatur Akademi Serakup Dayak Iban Sarawak ( ASADIA) udah berengkah dipejalaika pun bulan Februari tu tadi.
Nitihku Ketuai ASADIA Mabong Unggang, empat kelas nya nyengkaum belajarka ajat Iban ungkup raban orang indu, sape, betabuh enggau kelas bekuntau.
“Aku amat gaga ati laban kelas main asal ke diatur kami seruran nerima sukung enggau sambut ti manah ari mensia mayuh. Tu ngayanka bansa kitai beamat deka ngetan sereta ngerembaika main asal baka nengah program ke diatur ASADIA.
“Baka kitai ke diau ba mengeri, endang sigi nengah chara ngatur kelas main asal tu meh kitai ulih ngetan sereta ngerembaika main asal kitai,” ku iya madah ngagai Utusan Borneo.
Ku iya, bisi 12 iku orang indu nyengkaum 4 iku anak mit masuk kelas belajar ngajat orang indu.
Lebuh ke ngenang pasal belajar nebah sape, iya madahka nya siti ari juluk akademi nya deka ngerembaika pengelandik main sape ngagai raban bansa Dayak ke bukai bak Iban enggau Bidayuh.
“Tu ngambika pengelandik nya ila nyadi sebengkah pengelandik ti dikembuan bansa Dayak.
“Pasal kelas belajar ngajat orang indu, kelas tu endang seruran nerima sukung ti manah sereta ukai semina digulu indu kitai Iban aja tang nyengkaum bansa Bidayuh,” ku iya seraya madahka kelas belajar ajat Iban lelaki deka diatur enti nerima timbal ti meransangka ari raban lelaki.
Kelas belajar ajat indu diatur tiap Hari Satu (Isnin) & Hari Dua (Selasa); ajat Iban lelaki Hari Tiga (Rabu) enggau Hari Empat (Khamis); kelas sape Hari Lima (Jumaat) enggau Hari Enam (Sabtu) sereta kelas belajar bekuntau diatur tiap Hari Minggu (Ahad).
Sebarang tanya bekaul enggau kelas belajarka main asal tau ditanya ngagai Mabong ba lumur 012-6925562.