Philip: Perintah patut nyediaka mayuh pengawa puang ungkup raban nembiak
MIRI: Perintah patut nyediaka mayuh agi pengawa puang kelebih agi ungkup raban nembiak, ukai semina dikena ngangkatka diri tang mega ulih dikena ngerembai mansang sereta besemekih ba dunya kemaya hari.
Semina nengah pemisi kereja ti menyana aja raban nembiak ulih idup meruan sereta mega ulih mansang ba dunyi ti kompetitif.
Sapit Chairman Raban Pemikir Dayak ( DTTG), Philip Asry madahka gaya rampa kereja ti jampat berubah dalam jeman industri revolusyen 4.0 kemaya hari, perintah patut muka awak ungkup palan latih tauka pelajar ti tau nyeridi raban nembiak nambahka pengeregas sereta nemu nengkebang, belajarka injin, arus penyambung enggau teknologi pemadah (ICT) ti besai agi.
Ku Philip Asry, perintah patut berunding sereta ngerurunka baru ekonomi dikena nempa mayuh agi kereja ungkup bala nembiak, ukai semina kereja aja, tang kereja ti menyana lalu ulih meri penatai pemisi ti setipak, nangkup juluk sida lalu ngerembaika pengulih nya.
Ku iya, dikena nempa ekonomi ti meruan agi ungkup raban nembiak di Malaysia, perintah patut dulu agi ngemitka takah pengelandik graduet ari sukut pengurang pengelandik teknikal.
“Nya kebuah beguna endar opis menteri, ejensi enggau palan pelajar bela bekerejasama enggau gerempung ukai dikuasa perintah (NGO) sereta pemain industri ngatur program latih bekaul,” ku iya.
“Pia mega, kitai idup di dunya jampat berubah ke alai makit kereja mega jampat berubah, palan pelajar tinggi kitai patut nyikap raban graduet enggau pengelandik ti tau dipindah ngagai semua industri ti bebida, baka penau belajarka pekara baru enggau jampat,” ku iya nambah.
Kelimpah ari nya, ngaul diri enggau teknologi sereta rampa baru enggau runding chara analitik, kritis enggau kreatif. Pekara bukai ti dikedeka nyengkaum tikas pemanah pengawa enggau pengelandik orang ngatika diri, komunikasyen enggau nyadi ketuai ti manah, ku iya dalam penerang berita ditu, kemari.
Berebak enggau nya ku Philip, penau landik bejaku English endang beguna endar laban tebal agi dikena ba dagang di sektor peribit enggau renggat antarabansa.
“Pia mega, kitai patut berati sereta nunda penyikar pekereja China ti deka nyadi pekereja bepengelandik tinggi ba orang gawa berindik ari China berengkah bejalaika pengawa nyadi kuasa ekonomi dunya lalu mayuh beranakka puku di Malaysia,” ku iya.
Iya ngaku Malaysia begunaka sebengkah palan tegap undur dikena meri pengandal makit ba pemansang sektor peribit, ngambika orang bukai enggau firma ulih merambu sereta beranakka puku.
“Bisi polisi ekonomi ti manah meransang pemeranak puku strategik ba infrastruktur enggau merangsang inovasyen, ngemunaska pengurang makit enggau birokrasyen sereta nambahka integrasyen serantau baka dagang ASEAN, orang gawa, nyaga garis entara menua, enggau ke bukai.
“Patut bisi struktur akauntabiliti ti ditempa kgas dikena nentuka sebarang pelin ke bisi, dipejalai enggau meruan dikena nyeletik gaya kereja ungkup nembiak,” ku iya.
Ku Philip nambah, asil ari pengawa patut disukat chara objektif enggau chuan penerang kereja ti betul, penyampau kereja baru udah dipejalai enggau gaji median pekereja lalu ukai ari padah kaban politik.
“Ari orang gawa bepengelandik sereta setipak nangkup peminta makit, pengawa ngemaruka struktur gawa nuju penemu, teknologi, inovasyen enggau pengawa dagang.
“Pemisi sebengkah palan ti tegap, Malaysia deka ulih besemekih di benua Asia enggau pemekit serantau baka Singapore, Indonesia, Vietnam enggau Thailand dikena matak pemeranak puku lalu udah nya deka nempa mayuh agi pengawa puang ti meruan sereta bisi kualiti,” ku iya.
Taja pia ku iya, perintah endang patut nentuka sida mansang dudi hari.