Mensia mayuh dilalau meri darah ngagai TDHUS enggau Unit Mindah Kin Kitu Kimpin Meri Darah
KUCHING: Tabung Darah Hopital Umum Sarawak ( TDHUS) minta mensia mayuh ulih datai meri darah sekalika terus ngagai Tabung Darah nya tauka ba Unit Mindah Kin Kitu Kimpin Meri Darah TDHUS ke semak.
Nitihka penerang berita ari Sepital Besai Sarawak (HUS)kemari, Tabung Darah nya benung betapi enggau suntuk bekal darah bansa A, B enggau AB, ti udah kekalu mimit.
Lalu bansa darah 0 ba tikas jelan iya.
HUS nguna 45 ngagai 50 unit darah sehari.
Berindik ari penambah kes bedarah ke nyadi baka mutah darah, penusah bebadi ti ngujungka bedarah ba pengawa bebuntas ke tusah enggau ngena bekal darah ninting hari ungkup pesakit riman, leukemia enggau thalassemia.
Mensia mayuh kelebih agi raban pemeri darah ke udah tuai tauka ba timpuh ke chukup endur meri dipinta meri darah ba TDHUS tauka palan Kimpin Meri Darah ke bisi diatur ujung minggu tu.
Bup Rikod Meri Darah patut dibai awakka TDHUS ulih ngemaruka penyampau udah meri darah.
Ngagai orang ti keterubah iya meri darah, sida iya patut mai Kad Pengelala lalu Bup Rikod Mei Darah deka diberi TDHUS.
Sebedau meri darah, mensia mayuh dilalau makai pemakai ke lempung dulu sereta chukup belelak enggau chukup tinduk abis nadai lima jam.
Unit Mindah Kin Kitu Kimpin Meri Darah deka bisi ba empat endur ujung minggu tu.
Palan keterubah kena 24 Februari ba Ejensi Penerit Adat Maritim Malaysia, Sarawak, Muara Tebas berengkah pukul 9 pagi ngagai 2 lemai.
Palan kedua ba Mydin Vista Tunku, Petra Jaya berengkah pukul 10 pagi ngagai 4 lemai.
Kena 25 Februari, Unit Mindah Kin Kitu Kimpin Meri Darah deka diatur ba Emart Batu Kawa berengkah ari pukul 10 pagi ngagai 3 lemai enggau ba Summermall, Kota Samarahan mega berengkah ba jam ke sama.
HUS ngelaluka penyereta ari ejensi tauka opis perintah enggau gerempung ukai dikuasa perintah ( NGO) ngambika sama ngatur kimpin Meri Darah dikena mantu nambahka bekal darah ba TDHUS.
Penerang ke silik tau ditanya ngagai TDHUS nengah lumur 082 276797 enggau 276795.