Tu maya ti engkeman dikena mandangka KPI tetiap YB ngagai komuniti
MIRI: Barisan Nasional (BN) Sarawak patut nentuka chalun bediri minta pilih maya Pengawa Bepilih Besai Ke-14 (PRU14) tu iya nadai ngembuan penanggul disiplin.
Aktivis rama ke mega pemerati politik menua tu, Dato’ Wan Zain Syed Mohdzar madahka tu maya endur mantaika Indeks Penyulut Pengawa (KPI) bala pengari rayat ( YB) ngagai mensia mayuh.
“Tetiap YB bisi KPI sida empu, enti sema sida enda entu dikelala tauka gawaka rayat, sida endang patut diganti enggau orang baru laban peminta rayat patut dulu agi dikemerat lalu pemerat pengudah sida dipilih,” ku iya madah ngagai The Borneo Post kemari.
Ku Wan Zain, niang Tok Nan sebedau tu nyemetak madahka bala menteri tauka YB ti enda ngayanka sebarang pemanah ba KPI, sida enda deka dichalunka baru.
“Kitai dekaka pengari rayat ti dipilih endang gawa sereta bisi asil ari pengawa ngagai rayat dibida pengari rayat ti semina kiruh gawa
Tetiap YB bisi KPI sida empu, enti sema sida enda entu dikelala tauka gawaka rayat, sida endang patut diganti enggau orang baru laban peminta rayat patut dulu agi dikemerat lalu pemerat pengudah sida dipilih. Dato’ Wan Zain Syed Mohdzar Aktivis Rama
musim pengawa bepilih aja,” ku iya.
Ku iya, tu ukai semina parti penyakal aja ngayanka ulah ke bansa nya tang mega bisi mega sekeda pengari rayat BN empu enggau ulah ti sama.
“Bala sida udah diberi agih belanja dikena ngemansangka kandang menua, tang rayat di kandang menua sida agi jauh tinggal di belakang sereta mega enda ngasaika perengka guna infrastruktur.
“Kitai bejaku pasal rayat ti begunaka bantu lalu bala rayat tu udah ngundi, nya kebuah sida bisi hak dikemansang baka orang bukai,” ku iya.
Ku iya, enti sema pengari rayat enda ngintu kandang menua lalu semina kiruh ngereja pengawa diri empu, pengari rayat tu tau diganti enggau sida ti bepenau ke bukai.
“Bisi sekeda semina bisi ayan di menua diarika sida nyema bisi program ngaul bala ketuai besai lalu ‘lakun’ sida tu patut diketu,” ku iya seraya nambah, rayat di kandang menua diari sedar agi ulah bala pengari sida.
“Enti sema musim pengawa bepilih, bisi sekeda raban dipadu gawa nyerenih penyulut pengawa pengari rayat lalu asil serenih nya dianjung ngambika nyadi chuan penerang ngagai raban di atas lalu pekara dikenangika kitai, pengawa nyerenih asil kereja pengari rayat ti dipilih tu enda lurus, kelebih agi nyema orang ti nyerenih datai ari parti pengari empu,” ku iya nerang.
KPI bala pengari rayat enggau menteri iya nya polisi ti dikemeratka niang Tok Nan lalu enti sema KPI ti ditetap enda dijapai, sida deka ditingkil ari pangku pengawa.