Penyelai Sabah, Sarawak patut diterima dalam Malaysia
MIRI: Perintah Besai enggau Semenanjung Malaysia meseti ngaku Sabah enggau Sarawak tu nengeri ti ngembuan penyelai laban nengeri di Malaysia Timur iya nya entara menua ti nyadi pemungkal pengawa numbuhka Malaysia.
Pengawa ngaku tu beguna endar laban nya mangka ba atur gawa Sabah enggau Sarawak, pia ku penemu Raban Pemikir Dayak tauka Dayak Think-Tank Group (DTTG).
“Genteran jaku ‘Persekutuan Malaysia: Pandangan Dari Malaysia Timur’ nerangka di Semanjung Malaysia enggau di Sabah enggau Sarawak, beratika Federasyen Malaysia tu ari bemacham sukut.
“Sabah enggau Sarawak bela bisi pemereti ati ba peminta Federasyen Malaysia,” pia ku Sekretari DTTG Pampang Miri, Eva Bayang madah ngagai The Borneo Post.
Eva nyemetak madah ngagai peranak di Semenanjung Malaysia ke alai pun menua tu bisi iya nya berengkah dalam taun 1957, lebuh ti udah ulih megai perintah diri.
“Nengah penyelai Sabah enggau Sarawak lebuh ti begempung enggau menua Malaya ba pengawa numbuhka federasyen (Malaysia) mantaika kitai enda patut digaga baka nengeri ke bukai. Kededua nengeri datai ari nyadi kaban ngagai federasyen ti sama, semina nengah pindaan konstitusional dalam Parlimen 1976.
“Ubah ngagai Article 1 (2) Konstitusyen Perintah Besai ti ngelis Sabah enggau Sarawak nyadi ‘ nengeri’ dalam lis Federasyen Malaysia udah ‘nurunka’ penuduk sida,” ku iya.
Nya alai, kelas politik di Sabah enggau Sarawak patut besetuju baka ni deka nyingkang ngagai tikas udah tu dalam kaul perintah nengeri enggau perintah besai.
Pia mega, peranak Sabah enggau Sarawak empu meseti besetuju pasal pekara dudi hari, tang pekara tu bisi pemar laban raban tu dibagi, ku Eva.
“Bala sida tu ke amat tau dibagi ngagai tiga raban, dua udah nyengala ‘sakit’ lalu deka meleka ari federasyen, sida ti ngumbai diri enda kelalu ditempaya, lalu sida ti semina rindu nyadi pemerati aja.
“Patut bisi pengawa nyediaka diri ari perintah besai meresa kesemua isu atur kereja perintah seraban,” ku iya nambah.
Ambika chunto, iya bisi ditulis dalam Sempekat Malaysia 1963 (MA63) ke alai aum patut diatur 10 taun pengudah sempekat disain. Tang pengawa tu enda dikereja.
Perintah besai ke diatu patut ngatur aum tu dikena nyerenih baru sempekat ti oatut digaga dalam taun 1973, 10 taun pengudah sempekat nya disain, ku Eva nandu.
“Perintah besai patut bisi aum begulai enggau Singapore, Sabah enggau Sarawak ngambi berandauka pengawa nyaga ti dipesetuju di baruh sempekat tu.
“Tu penyelai awak ngagai Sabah enggau Sarawak minta Putrajaya ngatur aum udah 41 taun laun ari ke patut,” ku iya nampung.
Ku Eva nambah, isu petalat kenyau ari bepuluh taun, MA63 nyadi isu besai di Sabah enggau Sarawak kandang beberapa taun ke udah, kelebih agi pengudah ex-Kepala Menteri Sarawak, niang Adenan Satem minta mulaika baru hak enggau kuasa nengeri, baka ti udah bisi dalam sempekat nya.