Parti politik di luar Sarawak baka DAP, PKR nyengkaum UMNO enda ulih ngaga pemutus sereta nentuka kuing Sarawak jemah ila

SIBU: Semina parti politik ari Sarawak aja ulih nentuka tuju kuing nengeri tu ke jemah ila.

Kepala Menteri Datuk Patinggi Abang Johari Tun Openg madahka parti politik bepangkalan di luar Sarawak baka DAP, PKR nyengkaum UMNO enda ulih mutus sereta nentuka kuing Sarawak jemah ila kelebih agi ba peminta rayat iya.

“Rayat Sarawak enda begunaka bantu ari raban luar gawa negika hak laban kitai udah bisi parti politik Sarawak empu (parti komponen Barisan Nasional (BN)).

“Orang luar enda ulih nentuka kuing Sarawak jemah ila nyengkaum UMNO. UMNO enda ulih ngaga pemutus ke kitai.

“Nya kebuah, parti politik ari luar Sarawak baka PKR, DAP nyengkaum UMNO enda relevan ditu,” ku iya lebuh bejaku ba Pengerami Taun Baru China 2018 ke diatur Gempung Gerempung Bansa China (UCA) Sibu di sebuah hotel tebilang ditu, malam kemari.

Sama bisi datai bini Abang Johari Datin Patinggi Jumaani Tuanku Bujang, Menteri Dagang Antarabansa enggau EDagang Dato Sri Wong Soon Koh, Sapit Kepala Menteri Datuk Amar Douglas Uggah Embas, Temenggong Dato Vincent Lau, Sapit Konsulat Jeneral China Zhang Yang, Menteri Muda Perengka Pengangkut Datuk Dr Jerip Susil enggau Presiden UCA Sibu Kong Hian Khim.

Kelimpah ari nya, Chairman BN Sarawak nyemetak madahka ari rayat ti begempung, perintah nengeri ulih ngeringka agi penetap diri berandau enggau perintah besai ba pengawa nagih hak Sarawak ti udah lenyau.

“Nya alai, rayat Sarawak patut begempung lalu nadai orang bukai ulih nentuka hak kitai, kebuah pia laban politik jemah ila bepanggai ba parti politik Sarawak.

“Kitai semina begunaka rayat Sarawak nyaga hak Sarawak. Ukai UMNO, DAP enggau PKR, nyengkaum sebarang raban ari luar ke bukai,” ku iya nerang.

Ku iya, perintah nengeri diatu nyaris didinga lalu enda nangi ngetanka hak, seraya madahka perintah besai enda ulih ngenggaika hak enggau kuasa perintah nengeri ngambika nyaga, ngemata enggau ngintu pemansut.

Antara pekara nya, iya nya kuasa ngeluarka lisin ari baruh Undang-Undang Tanah Sarawak sereta Ordinan Ngelumbung Minyak Sarawak 1958 ti diteritka ngagai pengeluar enggau kunteriktor industri minyak enggau gis, ku iya.

Berindik ari nya ku iya, perintah nengeri deka nampung pengawa mulaika baru hak Sarawak ti udah lenyau ari baruh Sempekat Malaysia 1963 (MA63) ari perintah besai.

“Taja pia, kitai nagih hak kitai bepelasarka undangundang enggau konstitusyen, ukai nurutka asai ati,” ku iya.

Rayat Sarawak enda begunaka bantu ari raban luar gawa negika hak laban kitai udah bisi parti politik Sarawak empu (parti komponen Barisan Nasional (BN). Abang Johari Tun Openg Kepala Menteri Sarawak