MPWS udah nemuai nanggam kaul ngagai MWKS kemari

KUCHING: Majlis Penasihat Wanita Sabah (MPWS) udah nemuai meri basa ngagai Majlis Wanita dan Keluarga Sarawak (MWKS) ditu, kemari.

Penemuai nya ti betuaika Chairman MPWS Datuk Dr Tarsiah T.Z. Taman, disambut manah Chairman MWKS Dato Sri Fatimah Abdullah, ti mega Menteri Pengintu Pengelantang Pendiau, Orang Indu, Ruang Bilik enggau Pemansang Nembiak Mit ba Wisma Wanita.

Lebuh ke bekunsi pasal MPWS, Tarsiah madahka pengawa MPWS iya nya nyadi penyanding penemu ngagai Perintah Nengeri enggau Besai bekaul enggau isu orang indu.

MPWS ku iya, nyendiaka servis bantu enggau iring ngagai gerempung ukai dikuasa perintah (NGO) kelimpah ari mansik sereta meresa program tauka projek enggau perambu projek ti bekaul enggau orang indu.

Berebak enggau tu, Tarsiah madahka diatu MPWS ukai semina nyadi penyanding penemu tang mega bejalaika projek ke bekaul enggau raban orang indu kelebih agi di Sabah.

Ku iya, MPWS bisi bejalaika projek nengah tujuh komiti mit ke ditumbuh baka Pembangunan Kepekaan Gender, Ekonomi, Rama, Pelajar, Pengerai, Undang- undang enggau Orang & Media.

“Kelimpah ari nyadi penyanding penemu, kami (MPWS) udah ngaga pemutus enda tau enda ngereja ukai semina nyadi penyanding penemu aja.

“Berindik ari nya taun tu kami bisi numbuhka tiga projek iya nya Pusat Bantuan Guaman Wanita, Modul Interaktif Perkahwinan KanakKanak enggau Program ‘Creating Millionaires Among Young Women Entrepreneurs’.

“Nengah program ‘Creating Millionaires Among Young Women Entrepreneurs’ kami deka matih raban biak ke beumur 18 ngagai 35 taun ngambika ulih nempa mayuh agi orang dagang indu, dipelabaka latih tauka program tu deka berengkah bulan Mac tu,” ku iya seraya madahka pengawa MPWS sebaka enggau MWKS.

Nitihka penerang Tarsiah, Pusat Bantuan Guaman Wanita dipejalaika ari baruh Opis Hal Ehwal Wanita Sabah ti bejalaika tanggungpengawa meri servis bantu enggau lalau luyar sereta penyedar undang-undang ngagai orang indu di Sabah.

Bekaul enggau projek Modul Interaktif Perkahwinan Kanak-Kanak, Tarsiah madahka sida mekuh ngagai isu anak mit ke beumur 18 taun ke baruh ke diasuh tumu belaki ketegal ekonomi.

Nyempulang Tarsiah nemuai meri basa nya, sapit iya Datin Dr. Lungkiam Dambul Dumaring sereta kaban MPWS ke bukai, lalu penemuai nya kelimpah disambut Fatimah, sama nyambut penatai raban nya Menteri Muda Orang Indu, Ruang Bilik enggau Pemansang Nembiak Mit Rosey Yunus, Sekretari Mendam Opis Menteri Dr Saadiah Samat enggau Direktor Opis Orang Indu enggau Ruang Bilik Sarawak (JWKS) Noriah Ahmad sereta kaban MWKS ke bukai.