MWKS, MPWS deka besaup ngenegap orang indu
KUCHING: Majlis Wanita dan Keluarga Sarawak ( MWKS) enggau Majlis Penasihat Wanita Sabah (MPWS) ti bebendar deka ngenegapka raban orang indu ngambika sida patut ulih berubah nitihka segang pemansang, kelebih agi diatu dalam ekonomi digital.
Menteri Pengintu Pengelatang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madahka pekara nya dalam aum pengarang berita, kemari.
“Lebih agi diatu kitai dalam jeman ekonomi digital. Nya alai udah datai ba maya iya MWKS enggau MPWS ngubah pengawa.
“Diatu timpai kitai patut berubah nitihka ubah endur pendiau sereta jeman ke ditapi kitai diatu,” ku iya ti mega Chairperson MWKS.
Dulu ari nya Fatimah nerima penemuai basa kaban MPWS ke diatur ba bilik baum Opis Orang Indu enggau Ruang Bilik Sarawak (JWKS) di Wisma Wanita ditu, kemari.
Penemuai raban MPWS nya betuaika chairperson iya nya Datuk Dr. Tarsiah T.Z. Taman sereta disempulang kaban MPWS ke bukai.
Berebak enggau tu, dalam aum pengarang berita ke sama kededua MWKS enggau MPWS ti sama juluk udah selubang penemu num- buhka tim nengah media rama dikena ngenegapka raban orang indu di menua tu setipak enggau juluk perintah menua.
“Kami ( MWKS enggau MPWS) udah ngaga pemutus deka numbuhka raban WhatsApp ngambika ulih berandau enggau pangan diri pasal pengawa ti beratka juluk ke sama iya nya ngenegapka orang indu dalam ruang bilik kitai.
“Lalu tu pekara ti manah laban kitai Sabah enggau Sarawak enyau deka sama baka bekaul enggau isu, adat enggau main asal sereta rampa menua, kitai bisi sama senentang nya.
“Taja pia bisi mega pekara ke enda sama tang kitai ulih belajar ari pangan diri, awakka kitai ulih ngangkatka orang indu di Sabah enggau Sarawak,” ku iya.
Berebak enggau tu Fatimah mega madahka MWKS bisi ati deka ngemeranka atur ti dipejalaika MPWS, lalu pia mega MPWS bisi pengerindu deka nunda atur ke dipejalaika MWKS di nengeri tu.
“Kitai bisi ninga berita ti dipekunsi ke dipejalaika sida (MPWS) di Sabah. Kitai belajar ari sida sekeda pekara lalu kitai deka ngiga chara bakani deka bejalaika di Sarawak tauka MWKS.
“Lalu aku ngasaika sida udah nemu nama utai ke dipejalaika MWKS sereta sida bisi pengerindu deka nunda lebih agi bekaul enggau pengawa kitai ti numbuhka Palan Pengatur Pengereja Pengawa, ngumpul sereta nyelak dokumen ke nyerita penyulut raban orang indu enggau pengawa kitai ke numbuhka palan nyeridi anak mit ba endur gawa sereta Palan Latih,” ku Fatimah.
Sama bisi enggau Fatimah nerima penemuai basa nya kemari, Menteri Muda Pengelantang Orang Indu, Ruang Bilik enggau Pemansang Nembiak Mit Rosey Yunus; Sekretari Mendam Opis Menteri Dr. Saadiah Samat; Direktor JWKS Noriah Ahmad enggau kaban MWKS ke bukai sereta raban MPWS ke bukai.