Dikena nentuka penyerakup seruran bisi seraya ngenegutka kaul enggau pangan diri, ku Mong
SRI AMAN: Kaban Kunsil Nengeri (ADUN) Bukit Begunan, Datuk Mong Dagang meransang rayat di nengeri tu enda bemainka sentimen bansa tang patut bebasa sereta meretika adat enggau jalai pengarap komuniti bukai dikena ngenegapka agi penyerakup ke bisi di nengeri tu.
Nitih ku iya, nengah ulah bebasaka jalai pengarap enggau adat dikemeranka komuniti bukai, tentu nengeri enggau menua kitai tu deka seruran lantang nadai penyarut enggau pangan diri.
“Pekara ti dikearapka kitai ngambika isu ti ngaul pekara bansa enda patut diungkit laban nya tau ngeruga pengelikun enggau pengelantang menua kitai tu,” ku iya.
Iya mansutka jaku nya lebuhka dikerandau pengarang berita rambau Pengerami Nerima Pengabang Taun Baru China, Kapitan Kiew Siew Ted di rumah ketuai komuniti nya di Taman Pasir Panas, Sri Aman semak ditu.
Pia mega ku iya, Sarawak udah lebih 50 taun dalam Malaysia, nya alai, penyerakup raban bansa di nengeri tu patut dijaga enggau ditan lalu penyerakup ke bisi diatu chukup tegap dataika nerima puji tikas dunya.
“Semua tu asil ari pengawa bala ketuai menua ti seruran ngiga jalai pemadu manah nempa rayat di menua enggau nengeri tu ngambika meruan ngetanka penyer- akup ke bisi,” ku iya madah nyemetak.
Berebak enggau nya, iya mega ngarapka isu bekaul sentimen jalai pengarap patut diputar memananh, sedang iya tauka anang kelalu ba semua pekara ngambika enda ngasuh charut, nyadi laya enggau begedika pangan diri,” ku iya madah silik.
Sama bisi nyempulang iya ngabang Kaunsilor Menjang Niah sereta bala ketuai raban bansa ke bukai.
Pekara ti dikearapka kitai ngambika isu ti ngaul pekara bansa enda patut diungkit laban nya tau ngeruga pengelikun enggau pengelantang menua kitai tu. Datuk Mong Dagang ADUN Bukit Begunan