Gerald ngabang TBC ngagai komuniti China di Betong
BETONG: Kaban Kunsil Nengeri ( ADUN) Layar ti mega nyadi Ketuai Pemuda Parti Pesaka Bumiputera Bersatu ( PBB), Gerald Rentap Jabu enggau bini iya, Rosemarie Wong udah mujur ngintu pengerami hari besai Taun Baru China di Betong, lalu ngena awak nya ngabang ngagai bala tuai komuniti Cina di Betong.
Entara rumah komuniti China di lawa sida iya dalam kandang dua hari nya, exchairman Gerempung Chung Hua Si Thiam Seng, Kaban Komiti Gerempung Chung Hua Sik Sua Hua, Ong Tze Zhung, Chan Chu Chu, Yong Fah Ming, Sim Khung Hiu, Kapitan Kueh Sze Pin, chairman serakup Buddhist Betong, Own Chin Chung, Tepikong Fu Sheng Gong sereta sekeda komuniti china bukai.
Sama bisi enggau ngulu pengawa ngabang Taun Baru China di Betong, Sapit Kepala Menteri ti mega nyadi ADUN Bukit Saban, Datuk Amar Douglas Uggah Embas enggau bini iya, Datin Amar Doreen Mayang enggau ex- Sapit Kepala Menteri, Datuk Patinggi Tan Sri Alfred Jabu anak Numpang enggau exADUN Bukit Saban, Robert Lawson Chuat. MIRI: Opis Rampa Menua ( JAS) Miri udah ngambi sampel ai ari Sungai Padang besemak enggau Kampung Padang Kelulit, Bekenu kemari.
Pemesai DOE Miri, Julaiha Jumal madahka sekeda raban JAS enggau NREB udah ngelawa endur ti diripot lalu ngambi chunto ai sungai nya.
“Sampel ai tu deka dianjung ngagai Opis Kimia di Bintulu ngambika diperesa dikena nemu pun penyadi ikan mati di sungai nya,” ku iya madah ngagai Utusan Borneo kemari.
Kemari, peranak ari Kampung Padang, Kelulit madahka mayuh ikan di sungai Padang Kelulit mati melepu nadai ditemu pun penusah nyadi.
Sahie Ahad madahka penyadi ikan mati melepung di sungai nya kala nyadi dalam taun 2014 ketegal pengamah ai.
Pia mega, iya enda ngenggaika nyangka penusah nya nyadi ketegal pengamah ai sungai berindik ari teda ti dibuai kilang di kandang menua nya.
Ku Sahie, peranak genturung pendiau ngansak ejensi bekaul meresa silik pekara ti nyadi di sungai nya ngambika ulih diseliah dudi hari.
Taja pia, ku Julaiha, sampel ai patut diperesa dulu agi dikena nemu pun ke amat ngasuh ikan di sungai nya mati.
“Pengawa meresa tu nyangka begunaka timpuh pengelama sebulan lalu iya ngelalau peranak di genturung pendiau nya enda nempa jaku sengapa dataika pemutus ari peresa nya ditemu,” ku iya nerang.
Raban sida, ku Julaiha madah nyemetak, enda deka bebatak asur enggau raban ti bisi kaul ke ngasuh ikan mati di sungai nya.
“Kitai ukai semina ngambi sampel ai tang mega meresa kilang di kandang endur sungai nya dikena ngiga penerang nyema bisi teda kilang dibuai ke dalam sungai,” ku iya.