Dr Rayong ngelanggur bala paderi ke pinchin numbuhka siti tim pemikir
ENGKILILI: Kaban Kunsil Nengeri (ADUN) Engkilili Dr Johnical Rayong Ngipa ngelanggur bala paderi ke udah pinchin numbuhka siti tim pemikir ke fokus ngajar raban ke diselinting meretika ajar pengarap.
Kenu ku iya, penemu ke dikembuan bala sida ti pinchin paderi chukup beguna ngagai bala orang ke biak meretika ajar pengarap laban nya ulih nempa sida nyadi orang ke badas.
“Endang rugi nyema sida pinchin paderi nadai ulih neruska pengawa ninting hari ngerembaika ajar pengarap ti ngundan mayuh pengawa badas maya nguan dunya enggau maya udah nadai... kitai pechaya genap paderi ke udah entap ba pengarap ngembuan mayuh penemu ke patut dipekunsi,” ku iya.
Iya madah munyi nya rambau pengeramo Pre-Retirement and Thankgiving Lunch untuk The Ven. Archdeacon Chimbie Bunsie ba Gerija St. Michael Parish, Engkilili ditu apin lama ke udah.
Sama bisi datai Rev. Peter Augustine ke nyadi ketuai pengatur Gerija St. Michael.
Tambah mega, ungkup sida ke udah pinchin paderi terus neruska kelas lalu nyadi pengajar pengarap nengah yuran tau dibayar boleh meneruskan kuliah dengan menjadi guru agama dengan yuran boleh dikutip seperti yuran tuisyen.
Nerang silik, iya madah deka terus bebendar mantu semua rumah-rumah pengarap ba DUN Engkilili nengah chara nyadung geran MRP ti ukai semina ungkup gerija tauka chapel tang nyengkaum tepikong enggau masjid.
“Tu mih chara aku malas pemanah Tuhan nyentuk aku nyadi orang ke mujur sehari tu lalu nyeleti baru palan-palan pengarap ke pemaik enggau pengelantang raban orang ti bisi pengarap ba DUN tu,” ku iya.
Nangkan nya, Dr Rayong madah nya mega bisi dirintai dalam manifesto perintah Barisan Nasional (BN) ke deka semua palan pengarap di nengeri tu bela ampit dibantu lalu anang ngelak sida asai enda dikeibuh taja ngembuan kaban ke mimit.
“Taun tu aku ngungkupka urung RM350,000 ke turu tambah ngagai Gerija St. Michael Engkilili dikena nyeleti gerija sereta nambahka turu taun nyin kemari ke manggai RM200,000 lebih agi dikena ngaga palan paking, masang irkon, ngaga agu, ngaga rumah paderi enggau ke bukai,” ku iya seraya madah agih belanja ke bisi bela deka diagih ngagai gerija di Skim Skrang, Kubu Mali sereta gereia di Merindun.
Tambah mega, Kepala Menteri Datuk Amar Abang Johari Tun Openg enggau sapit iya Datuk Amar Douglas Uggah Embas chukup proaktif mantu semua palan pengarap ba nengeri tu lalu nya chunto pemadu manah.
Berebak enggau nya, The Ven. Archdeacon Chimbie Bunsi lebih ke bejaku madah diri chukup sinu ninggalka dunya ajar pengarap ke udah dipasuk iya pengelama 43 taun.
“Tang aku patut nemu dunya tu enda selama iya dipegai laban maya datai maya iya kitai pinchin peluang nya patut diberi ngagai orang ke nganti neruska misyen enggau visyen aku ke empat nyadi nyata,” ku iya.
“Taja udah tu nyadi orang periman...tang aku deka terus ngemataika pesan Tuhan ke udah nyadi sejalai ba tubuh enggau roh semengat,” ku iya.
Sama bisi datai iya nya sayap Indu enggau Nembiak Gerija St. Michael, bala sub deacon, kaunsilor, tuai-tuai rumah sereta sida ke diau besemak.