Nengah Program Nyukat Tanah NCR Inisiatif Baru, semua tanah ti udah disukat deka nerima Surat Pala Tanah
MIRI: Perintah nengeri nyamin ngagai semua pengempu tanah ke udah digazet baruh Program Nyukat Perimeter Tanah Hak Bansa Asal (NCR) Inisiatif Baru, ngambika enda irau bekaul isu ngambi hak tanah.
Sapit Kepala Menteri ke mega Menteri Pemansang Mengeri enggau Pengeraja Asal II Datuk Awang Tengah Ali Hassan madahka pengawa ngaga rangkat tanda tu kelai sapa ti bempu tanah nya sereta garis entara tanah sida.
”Nengah pengawa ngazet tu, tetiap pengempu tanah enda ibuh irau bekaul kes ngambu tanah laban gazet tu udah nyadika kelai tanah nya sereta garis entara tanah nya ti diempu genturung pendiau kita,” ku iya nyamin.
Awang Tengah madah munyi nya lebuh ti bejadika Pengerami Nyuaka ‘Warta Rizab Komunal Bumiputera (Pertanian)’ Seksyen 6 Kanun Tanah Nengeri sereta Chek Pampas Tanah ungkup Bagi Menua Miri ti digaga ba sebuah hotel ditu kilah ensana.
Teks iya dibacha Menteri Muda Perambu Mengeri, Pengatur Tanah enggau Rampa Menua Datu Len Talif Salleh.
Nitih ku Awang Tengah, sepengudah digazet ari baruh Program Nyukat Perimeter NCR Inisiatif Baru renggat keterubah, tanah di kandang endur nya lalu nyadi hak eksklusif ngagai komuniti Iban enggau Melayu ti madahka nya tanah NCR sida.
” Sepengudah digazet, pengempu tanah nya semina sesingkang agi sebedau sida bulih surat pala tanah ari baruh Seksyen 18 Kanun Tanah Nengeri. Dikena ngulihka surat pala tanah nya, kita bisi nengah renggat kedua iya nya Program Nyukat Lot Individu,” ku iya.
Opis Tanah enggau Survei (JTS) begunaka kerejasama penuh ari piak kita kelebih agi komiti genturung pendiau tauka rumah panjai dikena mantu dalam pengawa ngelai garis entara lalu datai maya kereja nyukat nya dipejalai. Kerejasama rat pengempu tanah sentang pekara tu deka nentuka pengawa nyukat lot individu nya ila bejalai enggau manah,” ku iya nambah.
Awang Tengah madahka nyentuk 31 Januari tu, Program Nyukat Perimeter NCR Inisiatif Baru di selampur Sarawak udah mujur nyukat 509 kandang endur ti mungkur pemesai 827, 813 hektar, lalu penyampau ke udah digazet iya nya 421 kandang endur ti mungkur 656, 373 hektar.
Beserimbai enggau nya, di bagi menua Miri aja, penyampau kandang enudr ke udah tembu disukat iya nya 33 buah kandang endur ti mungkur 28, 548 hektar lalu penyampau ti udah digazet iya nya 25 buah kandang endur ti mungkur 15, 584 hektar.
Kelimpah ari nya, kilah ensana Len Talip udah nyuaka Warta Rizab Komunal Bumiputera (Pertanian) Seksyen 6 Kanun Tanah Nengeri ungkup bagi menua Miri iya nya ba tiga kandang menua – Sungai Entulang, Bakong (rumah panjai Entulang) pemesai 763 hektar sereta kandang menua Sungai Libai Niah (rumah panjai Libai) pemesai 37.271 hektar, lalu kededua nya dalam komuniti Iban.
Kandang menua ketiga iya nya ba Kampung Tegageng, Suai ti mungkur Kampung Tegageng, Kampung Baru, rumah panjai Senit sereta rumah panjai Libau (ungkup komuniti Melayu enggau Iban) ti mungkur tanah pemesai 435.487 hektar.
Lalu surat pala tanah ari baruh Seksyen 18 Kanun Tanah Nengeri (lot individu) ungkup tanah NCR ke udah tembu disukat ba renggat kedua ari baruh program ke sama mega bisi nerima nya kemari ti diberi ngagai 328 iku pengempu tanah.
Bisi 428 Surat Pala Tanah udah dikeluarka ti ngaul tanah NCR ke mungkur pemesai 743.251 hektar ba tujuh buha genturung pendiau iya nya Rumah Albion, Rumah Senang, Sungai Libai Niah, Sungai Skrat Niah, Kampung Sebalik Tiris, Kampung Pintasan enggau Kampung Kayu Kapor.
Beserimbai enggau nya, ba pengerami ti sama Len mega udah nyuaka chek pampas sepenyampau RM1,849,104.50 ngagai 109 iku pengempu tanah ti kena pansa tiga projek iya nya Projek Jalai Saeh, Projek Jematan Sungai Sibuti sereta projek ngaga jalai masuk ke Kampung Rambai, Bekenu lalu ketiga iya nya Projek Nirika Sub- stesyen di Merigam, Long Lapok, Tinjar.
Awang Tengah dalam jaku iya madahka pengawa nyuaka chek pampas nya udah ngayanka tetiap pengawa begunaka tanah ti digaga perintah, deka diberi pulai pampas enggau nadai bechiping lalu ipak ke pengempu tanah seriris enggau agih belanja ke udah bisi dalam Kanun Tanah Nengeri (Bab 81) enggau Pekara 13 Perlembagaan Persekutuan.
Sama bisi datai iya nya Kaban Kunsil Nengeri (ADUN) Piasau Datuk Sebastian Ting, Direktor Opis Tanah enggau Survei Sarawak Zaidi Mahdi sereta Penguasa Tanah enggau Survei Bagi Menua Miri, Arni Abd Rahman.