MPKS sedia mantu Opis Pengerai mutar kerekai penyakit Hepatitis A
KUCHING: Kaunsil Mengeri Kota Samarahan (MPKS) sedia meri bantu enggau sukung ngagai Opis Pengerai Negeri (JK) Sarawak dalam mutarka kerekai penyakit Hepatitis A ba sitak ke dijaga sida.
Chairman MPKS Datuk Peter Minos madah tu beguna dikena nentuka semua atur nagang sereta munaska kerekai penyakit Hepatitis A.
“Kitai deka nyaup mutarka penanggul Hepatitis A lalu munaska penyakit tu.
“Nya kebuah MBKS sedia mantu sebarang aja pengawa ngagai JKN Sarawak dalam munaska penyakit ukai semina Hepatitis A tang mega rabies,” ku iya.
Iya madah munyi nya dikena nimbal dua kes Hepatitis A ke dikenuku bisi nyadi ba Kampung Asajaya Laut, Kota Samarahan.
Minos madah, kereja sebaka entara MPKS enggau JKN Sarawak deka ransing agi dipejalai dikena nentuka bagi menua Samarahan likun.
“Kitai deka Samarahan seruran beresi sereta likun setipak enggau juluk MPKS iya nya ‘Cantik, Bersih dan Hijau,” ku iya.
Ngelansa silik pasal kes Hepatitis A ke nyadi ba sitak ke dijaga MPKS, Minos iya berasai gaga lalu lantang ati laban Direktor Pengerai Nengeri Sarawak, Dr Jamilah Hashim udah ngenukuka pekara nya nengah surat kaban kemari.
“(Diatu) chukup mayuh pekara dikerandau dalam internet lalu bisi nya enda amat.
“MPKS bisi nguji minta penerang ari Opis Pengerai Bagi Menua Samarahan tang sida ngasuh kami nganti pekara nya diaku Direktor (JKN Sarawak),” ku iya.
Dr Jamilah ba penerang iya madah pengawa nyidi kes ransing dipejalaika bepun 15 Februari 2018 tu tadi nyentuk ke diatu.
Nya kebuah, ku iya JKN Sarawak udah enggau benung bejalaika aktiviti enda ngetu baka matau sereta ngulih penerang ari semua klinik nyengkaum sepiak peribit.
JKN Sarawak ku iya udah bejalai pansik kualiti ai ba sitak nya lalu tetemuka iya nitihka standard ke diletal Opis Menteri Pengerai Malaysia (KKM).
Nyadi dikena mutar, JKN Sarawak ku iya deka bebendar agi bejalaika pengawa nabur penemu sereta chara nyeliahka penyakit
Hepatitis A ngagai mensia mayuh lalu minta sida ngemeratka pemeresi diri, maya nyendia pemakai enggau ai irup sereta nenuka kandang besemak beresi.
“JKN Sarawak enggau ejensi bekaul deka terus matau kualiti ai ke datai ari loji ai beresi,” ku Dr Jamilah.